धावक उसेन बोल्टलाई अष्ट्रेलियाको शीर्ष डिभिजनबाट लिग खेल्ने मौका मिलेको छ।
फुटबलमा करियर खोजिरहेका आठ पटकको ओलम्पिक च्याम्पियन ट्रयाक एण्ड फिल्डका ३२ वर्षिय बोल्टलाई अष्ट्रेलियाको शीर्ष डिभिजन क्लब सेन्ट्रल कोष्ट मरिनर्सले अनुबन्धको लागि प्रस्ताव गरेको अन्तर्राष्ट्रिय सञ्चार माध्यमहरूले जनाएका छन्।
बोल्टलाई क्लबले अनुबन्धको लागि प्रस्ताव गरेको उनका एजेन्ट रिकी सिम्सले जानकारी दिएका छन्।
उनले बोल्टलाई क्लबले अनुबन्धको प्रस्ताव गरेको भए पनि आफूले यस विषयमा अरू धेरै नबोल्ने बताएका छन्।
यसअघि बोल्टले माल्टा डिभिजन क्लब भलेट्टा एफसीले गरेको प्रस्ताव अस्वीकार गरेका थिए।
व्यावसायिक फुटबलमा करियर बनाउन बोल्ट गत अगष्टबाट सेन्ट्रल कोष्ट मरिनर्स क्लब अष्ट्रेलियामा अभ्यासरत छन्।
एक साताअघि भएको मैत्रीपूर्ण खेलमा मरिनर्सबाट खेल्दै उनले म्याकर्थर साउथ वेष्टविरुद्ध दुई गोलसमेत गरेका थिए ।
गत वर्षको अगस्टमा विश्व च्याम्पियनसिप खेलेपछि बोल्टले ट्रयाक एण्ड फिल्डबाट सन्यास लिएसँगै फुटबलमा करियर खोजेका थिए।
ट्रयाक एण्ड फिल्डमा हालसम्मकै सफल धावक समेत रहेका बोल्ट शताब्दीकै उत्कृष्ट धावक हुन्। उनले ओलम्पिक खेलकुदमा मात्र ८ वटा स्वर्ण पदक जितेका छन्। त्यस्तै उनको नाममा १०० मिटरमा विश्व किर्तिमान समेत छ।
बोल्टले दौडको सफलतापछि फुटबलका लागि जर्मनी र नर्वेमा पनि ट्रायल दिएका थिए।तर, उनी त्यहाँ असफल भए।
आठ ओलम्पिक स्वर्णको किर्तिमान लेखाएका यी तेज धावकले फुटबललाई सँगै लिएर कति चाडो कुद्ने हुन् त्यो हेर्न बाँकी छ।