स्टार खेलाडी मेसी बिनाको अर्जेन्टिनाले इराकमाथि शानदार जित दर्ता गरेको छ।
साउदी अरेबियामा बिहीबार राति भएको मैत्रीपूर्ण खेलमा अर्जेन्टिनाले इराकलाई ४-० ले हराउँदै सानदार जित निकालेको हो।
अर्जेन्टिनाको जितमा लाउतारो मार्टिनेज, रोबर्तो परेयरा, जर्मन पजेला र फ्रान्को सेर्भीले गोल गरे।
दोस्रो रोजाईका खेलाडीसहित धेरैजसो युवा खेलाडीसहित मैदानमा उत्रिएको अर्जेन्टिनाले इराकमाथि सहज जित निकालेको हो।
यो खेलमा अर्जेन्टिना लियोनल मेसीसँगै सर्जियो अग्यूरो, गोन्जालो हेगुइनसहितका स्टार खेलाडी थिएनन्।
खेलको १८ औं मिनेटमा लाउतारोले गोल गर्दै अर्जेन्टिनालाई सुरूवाती अग्रता दिलाए।
पहिलो हाफ १-० ले अघि रहेको अर्जेन्टिनाले दोस्रो हाफमा थप ३ गोल गर्यो।
दोस्रो हाफको ५३औं मिनेटमा रोबर्तो परेयराले गोल गर्दै अग्रता दोब्बर बनाए। अधिकांश समय दबाबमा राखेको अर्जेन्टिनाले खेलको ८२औं मिनेटमा जर्मन पजेल्लाले गोल गर्दै खेलमा ३-० को अग्रता बनाए।
इन्जुरी समयको पहिलो मिनेटमै फ्रान्को सेर्भीले गोल गर्दै अर्जेन्टिनालाई ४-० को सहज जित दिलाए।
