यो वर्षको फिफा उत्कृष्ट खेलाडीको उपाधि क्रोएसियाका कप्तान तथा स्पेनिस क्लब रियल मेड्रिडका मिडफिल्डर लुका मोड्रिचले जितेका छन्।
रसिया विश्वकपमा क्रोएसियालाई फाइनलसम्म पुर्याएका मोड्रिच फिफा उत्कृष्ट खेलाडी बन्ने पहिलो क्रोएसियन हुन्।
उनले पोर्चुगिज स्टार क्रिस्टियानो रोनाल्डो र इजिप्टका मोहम्मद सलाहलाई पछि पार्दै उपाधि जितेका हुन्। सोमबार राति लण्डनमा घोषणा भएको नतिजाअनुसार मोड्रिचले २९ प्रतिशत भोट पाए भने रोनाल्डोले १९ र सलाहले ११ प्रतिशत भोट पाए।
१० वर्षदेखि रोनाल्डो र लियोनल मेसीको दबदबा रहँदै आएको यो उपाधि यसपालि मोड्रिचले आफ्नो पोल्टामा पारेका हुन्।
यही वर्ष भएको रसिया विश्वकपमा मोड्रिचको चर्चा चुलिएको हो।
इंग्ल्याण्डविरूद्धको सनसनीपूर्ण खेलमा २-१ को नतिजा निकालेपछि २७ वर्षअघि स्वतन्त्र देश बनेको क्रोएसिया पहिलो पटक विश्वकपको फाइनल पुगेको थियो।
समूह चरणको दोस्रो खेलमै लियोनेल मेसी नेतृत्वको अर्जेन्टिनालाई ३-०ले हराएपछि क्रोएसियाले धेरैको ध्यान तान्यो। प्रिक्वार्टर र क्वार्टर फाइनलमा उसले पेनाल्टीबाट डेनमार्क र रसियालाई पाखा लगायो।
विश्वकपअघि स्लोभेनिया, हंगेरी, सर्विया, बोस्निया एण्ड हर्जगोभिनिया र एड्रियाटिक सीले घेरिएको झन्डै ४२ लाख मानिस बस्ने यो देशबारे धेरैलाई थाहा थिएन।
आफूभन्दा पछि जन्मिएको देशलाई फाइनलसम्म पुर्याउन मोड्रिचले ठूलो योगदान दिएका थिए।
'यो अवार्ड मेरोमात्र होइन। यो मेरा क्रोएसिया र रियल मेड्रिडका सहकर्मीहरूको पनि हो। मेरा प्रशिक्षकबिना म जित्न सक्दैनथें। र मेरो परिवार बिना आज म जुन किसिमको फुटबल खेलाडी छु त्यो हुन सक्दैनथें,' ३३ वर्षीय मोड्रिच अवार्ड ग्रहणपछि भने।
यहाँसम्म आइपुग्न जिन्दगीमा उनी आफैंले खाएको हण्डरठक्करको फेहरिस्त पनि लामै छ।
९ सेप्टेम्बर १९८५ मा जन्मिएका हुन्, मोड्रिच। उनका बुवाआमा कारखानामा काम गर्न घरदेखि टाढा जान्थे। मोड्रिच आफ्ना हजुरबुवासँग बस्थे। उनकै काखमा सुत्थे। उनकै काँधमा चढ्थे। हजुरबुवा पनि उनलाई निकै माया गर्थे।
समयको चक्र सधैँ उसैगरि कहाँ चल्छ र? मोड्रिच ६ वर्षका हुँदा उनको गाउँ मोड्रिचीमा केही सर्वियन मिलिसिया आए। त्यतिबेला बाल्कन युद्द चलिरहेको थियो। ती मिलिसियाले केही निर्दोष गाउँलेलाई मारिदिए। मारिनेमा मोड्रिचका प्यारा हजुरबवा पनि थिए। जो वस्तुभाउ चराउन गएका थिए। मिलिसियाले बाँचेकालाई गाउँ छोडेर जान उर्दी दिए।
मोड्रिच पनि आफू जन्मिएको पहाडको काखमा रहेको मोड्रिची गाउँ छोडेर जान बाध्य भए।
बुवाआमाले उनलाई तटीय सहर जदारमा ल्याए। त्यहाँ उनीहरू आन्तरिक शरणार्थी बनेर बसे।
जदारमा मोड्रिचको घर थिएन उनीहरू होटलमा बसे। युद्द जारी थियो। बिजुली र पानीको राम्रो सुविधा नभएको उनीहरूको कोठाबाट बम र ग्रिनेड पड्केको आवाज आइरहन्थ्यो।
मोड्रिच भने होटलभित्रै फुटबल खेल्थे।
‘बम र ग्रिनेड पड्केरभन्दा उनले हानेका बलले होटलका धेरै सिसा फुटे,’ कोलोभेयर होटलका प्रवक्ताले भने,‘उनी जतिबेलामा पनि होटलको हलमा फुटबल खेलिरहेका हुन्थे।’
त्यो ज्यादै कठिन समयमा पनि मोड्रिचले हार मानेनन्।
‘धेरै वर्षसम्म हामी पैसाको अभाव झेल्दै होटलमा बस्यौं। तर मैले कहिल्यै फुटबल छोडिनँ। म अहिले पनि सम्झन्छु पहिलो पटक खुट्टामा सिन प्याड लगाएको। तिनमा ब्राजिलका रोनाल्डो थिए। मलाई ती खुब मन पर्थे,’मोड्रिचले भनेका छन्।
उनले हजुरबुवा गुमाउनु पर्दाको पीडाले आफूलाई बलियो बनाएको बताएका छन्।
‘६ वर्षको हुँदा युद्धले हामीलाई शरणार्थी बनायो। त्यसैले मलाई बलियो पनि बनायो। त्यो म र मेरो परिवारका लागि निकै कठिन बेला थियो। तर म सधैँ त्यही कुरा सम्झिरहन चाहन्न नत सधैँका लागि बिर्सन नै चाहन्छु,’ मोड्रिचले भनेका छन्।
१० वर्षको हुँदा उनलाई धेरै प्रशिक्षक कमजोर र लजालु भएकाले फुटबल खेल्न नसक्ने बताउँथे।
जदारमा उनलाई प्रशिक्षण दिने टोमिस्लाभ बेसिचले भने उनलाई राजधानीको क्लब डिनामो जाग्रेबमा ट्रायल दिन लगाए। २००३ मा उनी सो क्लबमा आवद्ध भए। त्यहीँबाट उनको प्रतिभाले प्रष्फुटन हुने मौका पायो। त्यसपछि भने मोड्रिचले पछाडि फर्कनु परेन।
सन् २००८ मा उनी लण्डनको टोटेनहम हटस्पर गए। चार वर्ष त्यहाँ बिताएपछि सन् २०१२ मा उनी स्पेनिस क्लब रियल मेड्रिड पुगे। उनी अहिले पनि रियलका भरपर्दा मिडफिल्डर हुन्।
जाग्रेबमै हुँदा उनको फुटबल एजेन्ट भान्जा बोस्निचसँग भेट भयो। चिनजान प्रेममा बदलियो। ४ वर्षपछि उनीहरूले विवाह गरे। अहिले उनीहरूका तीन सन्तान छन्।