आइतबार राति स्पेनिस ला लिगामा बार्सिलोना र जिरोनाबीचको फुटबल २-२ को बराबरीमा टुङ्गिएको छ।
सो खेलमा बार्सिलोना १० खेलाडीमा सिमित हुन पुगेको थियो। ३५ औँ मिनेटमा क्लेमेन्ट लेङ्गलेन्ट सीधै रातो कार्ड पाएर मैदानबाट बाहिरिएपछि बार्सिलोना १० खेलाडीमा सीमित भएको थियो ।
खेलमा पहिलो अग्रता बार्सिलोनाले लिएको थियो। उसको लागि सो अग्रता घरेलु मैदानमा लियोनल मेस्सीले १९ औं मिनेटमा गरेका थिए।
मेस्सीले दिलाएको अग्रतालाई जिरोनाले खेलको ४५ औं मिनेटमा बराबरीमा ल्यायो। सो गोल क्रिष्टियन स्टुअनीले गरे।
साविकको विजेता बार्सिलोनाविरूद्ध स्टुआनीले खेलको दोश्रो हाफको सुरूवातमै अर्को गोल गर्दै दबाब दिए। ५१ औं मिनेटमा गोल गर्दै उनले जिरोनीका लागि २-१ को अग्रता कायम गरेका थिए।
१० खेलाडीमा सिमित भएर १ गोलले पछि परेको बार्सिलोनालाई पिकेले ६३ औँ मिनेटमा बराबरी गोल फर्काउँदै राहत दिए।
बराबरीपछि पाँच खेलबाट १३ अंकसहित बार्सिलोना शीर्ष स्थानमा पुगेको छ भने समान अंकसहित रियल मड्रिड दोस्रोमा छ ।
यस्तै सो लिगमा आइतबार राति नै भएका अन्य खेलमा सेभिल्लाले लेभान्टेलाई ६–२ ले हरायो भने रियल बेटिस र एथ्लेटिको बिल्बाओले २–२ तथा भिल्लारियल र भ्यालेन्सियाले गोलरहित बराबरी खेल टुङ्ग्याए ।