नेपाली राष्ट्रिय टोलीका पूर्व कप्तान अनिल गुरुङलाई थ्री स्टार क्लब ललितपुरले क्लबमा अनुबन्ध गरेको छ ।
यही असोज १३ गतेदेखि शुरु हुने शहीद स्मारक ए डिभिजन प्रतियोगिताका लागि थ्रीस्टरले अनिललाई आज क्लबमा भित्र्याएको क्लबका महासचिव सञ्जिव शिल्पकारले जानकारी दिएका हुन् ।
उनी १३ वर्षपछि थ्री स्टार फर्किएका हुन्।
उनले लक्ष्मी हुन्डाई मनाङ मस्र्याङ्दीसँगको लामो यात्रा औपचारिक रुपमा बुधबार अन्त्य गरेको थिए। उनी त्यसको भोलीपल्टै थ्री स्टारमा आबद्ध भएका हुन् ।
'अनिललाई यो सिजनका लागि हामीले क्लबमा अनुबन्ध गरेका छौँ, सम्झौता रकमबारे दुवै पक्षको सहमतिअनुसार सार्वजनिक गर्दैनौ', उनले भने ।
पछिल्लो समय लक्ष्मी हुन्डाई मनाङ–मस्याङ्दी क्लबका कप्तानसमेत रहेका अनिलले एक सातायताबाट थ्री स्टारबाट प्रशिक्षण गरिरहेका थिए ।
थ्री स्टारले क्लबको जर्सीसहित आफ्नो अफिसियल फेसबुक पेजमार्फत अनिलको तस्वीर राख्दै भनेको छ, 'अनिल गुरुङलाई थ्री स्टार क्लबमा स्वागत छ ।'
अनिलले अन्तर्राष्ट्रिय फूटबल करियरबाट भने सन्यासको घोषणा गरिसकेका छन् ।
पोखराको साहारा क्लबबाट फूटबल करियर शुरु गरेका अनिलले ब्रिगेट ब्वाइज, थ्रीस्टार, मनाङ मस्र्याङ्दी, न्युरोड टिम (एनआरटी) र भारतको शीर्ष डिभिजनको क्लब सिलोङ लाजोङबाट व्यावसायिक फूटबल खेलिसकेका छन् ।
