युभेन्टस क्लबबाट च्याम्पियन्स लिगको पहिलो खेलमै पोर्चुगिज स्टार क्रिस्टियानो रोनाल्डोले रातो कार्ड पाएका छन्।
बुधबार राति भ्यालेन्सियाविरूद्धको खेलको २९ औं मिनेटमा भ्यालेन्सियाका डिफेन्डर जेसन मुरिलोको कपाल तानेपछि रेफ्री फेलिक्स ब्रिचले रोनाल्डोलाई रातो कार्ड दिएका हुन्।
रोनाल्डो बाहिरिए पनि १० खेलाडीमा सीमित भएको युभेन्ट्सले त्यसपछि पाएको २ वटै पेनाल्टीमा गोल गर्दै खेल २-० ले आफ्नो पक्षमा पार्यो।
रातो कार्ड पाएपछि रोनाल्डो रुँदै मैदानबाट बाहिरिएका थिए। युइएफएले अहिले नै उनलाई कतिवटा म्याचमा निलम्बन गर्ने निर्णय गरिसकेको छैन। तर स्वभाविक रूपमा हुने एक म्याचको भन्दा धेरैमा निलम्बन भए उनले पूर्वक्लब म्यान्चेस्टर युनाइटेडको घरेलु मैदान ओल्ड ट्राफोर्डमा हुने समूह चरणको खेल पनि गुमाउनेछन्।
१० करोड पाउन्डमा रियल मेड्रिडबाट युभेन्टस गएका रोनाल्डोले इटालियन क्लबमा राम्रो प्रदर्शन गर्न सकेका छैनन्। घरेलु लिगका सुरूका तीन खेलमा गोल गर्न नसकेका रोनाल्डोले चौथो खेलमामात्र २ गोल हानेका थिए।
म्यान्चेस्टर युनाइटेडमा एक पटकसहित पाँच पटक च्याम्पियन्स लिग जितेका प्रतियोगिताको इतिहासमै सर्वाधिक गोल गर्ने रोनाल्डोको ह्याट्रिक रेकर्ड मंगलबारमात्रै मेसीले तोडेका थिए।
