इंग्ल्यान्डका पूर्वकप्तान डेभिड बेकह्याम युरोपियन फुटबलको उच्च अवार्ड 'युईएफए प्रेसिडेन्ट्स अवार्ड' बाट सम्मानि हुने भएका छन्।
युरोपियन फुटबलको सर्वोच्च निकाय युनियन अफ युरोपियन फुटबल एसोसिएसन (युईएफए) ले मंगलबार बेकह्यामलाई 'युईएफए प्रेसिडेन्ट्स अवार्ड' दिने निर्णय गरेको हो।
युईएफएले फुटबलमा पुर्याएको योगदानको कदर गर्दै बेकह्यामलाई यो बर्षको प्रेसिडेन्ट्स अवार्ड दिन लागिएको जनाएको हो।
सन् २०१८ को युईएफए प्रेसिडेन्ट्स अवार्ड डेभिड बेकह्यामलाई दिने घोषणा गर्न पाउँदा आफू निकै खुसी रहेको भन्दै युईएफए प्रेसिडेन्ट्स अवार्ड घोषणा कार्यक्रममा युईएफएका अध्यक्ष एलेक्जेन्डर सेफेरिनले भने, ‘बेकह्याम आफ्नो पुस्ताका एक सच्चा फुटबल आइकन हुन्।’
युईएफएले बेकह्यामलाई आगामी अगष्ट ३० मा मोनाकोमा हुने विशेष समारोहकाबीच बेकह्यामलाई अवार्ड दिने बताएको छ। सोही दिन युईएफएले च्याम्पियन्स लिगको खेल तालिका पनि सार्वजनिक गर्दैछ।
युईएफएले विश्व फुटबलमा लामो समयबाट योगदान दिदै आएका पूर्व खेलाडीलाई यो अवार्ड दिने गर्छ।
प्रेसिडेन्ट्स अवार्ड पाउने भएपछि युनिसेफका सद्भावना दूतसमेत रहेका बेकह्यामले आफूलाई गर्व महसुस भएको बताए।
२० वर्ष फुटबल खेलाडीका रुपमा सक्रिय रहेका बेकह्यामले इंग्लिस टोलीबाट ११५ अन्तर्राष्ट्रिय खेल खेल्दै १५ गोल गरेका छन्। ४३ वर्षीय बेकह्यामले आफ्नो क्लब करियरमा १० लिग उपाधिसहित १९ ट्रफी जितेका छन्।
बेकह्यामले इंग्लिस क्लब म्यानचेस्टर युनाइटेड, स्पेनिस क्लब रियल मड्रिड, इटालियन क्लब एसी मिलान, फ्रेन्च क्लब पिएसजी र अमेरिकी क्लब एलए ग्यालेक्सीबाट व्यवसायिक फुटबल खेलेका थिए।