इंग्लिस प्रिमियर लिग फुटबलमा साबिक बिजेता म्यानचेस्टर सिटीले फराकिलो जित निकालेको छ।
प्रिमियर लिगको नयाँ सिजनमा लगातार दोस्रो जित निकाल्ने क्रममा सिटीले आइतबार हडर्सफिल्ड टाउनलाई ६-१ गोलको फराकिलो अन्तरले हराएको हो।
घरेलु मैदानमा सिटीला फराकिलो जित दिलाउन सर्जियो अग्यूरोले ह्याट्रिक पुरा गरे भने ग्राबियल जिसस र डेभिड सिल्भाले एक-एक गोल गरे। सिटीले एक गोल आत्मघाती उपहार पाएको थियो।
हडर्सफिल्डका टेरेन्स कोन्गोलोले आत्मघाती गोल गरे भने जोन स्टानकोभिचले एक गोल फर्काएका थिए।
इतिहाद स्टेडियममा भएको खेलमा २५ औं मिनेटमा अग्यूरोले गोल गर्दै सिटीलाई सुरूवाती अग्रता दिलायो।
खेलको ३१ औं मिनेटमा जिससले सिटीको अग्रता दोब्बर बनाए। त्यसपछि खेलको ३५ औं मिनेटमा अग्यूरोले व्यक्तिगत दोस्रो गोल गर्दा सिटीको अग्रता तेब्बर बन्यो।
खेलको ४३ औं मिनेटमा हडर्सफिल्डका स्टानकोभिचले एक गोल फर्काएपछि सिटी पहिलो हाफमा ३-१ ले अघि रह्यो ।
दोस्रो हाफमा सिटीले थप तीन गोल गर्यो। ४८ औं मिनेटमा सिल्भाले गोल गर्दै सिटीको अग्रता ४-१ पुर्याए। खेलको ७५ औं मिनेटमा अग्यूरोले गोल गर्दै ह्याट्रिक पुरा गरे। त्यसपछि खेलको ८४ औं मिनेटमा कोन्गोलोले आत्मघाती गोल गरेपछि सिटी ६-१ को फराकिलो जित निकाल्न सफल भयो।
जितसँगै सिटी २ खेलबाट ६ अंक जोडेर लिगको शीर्ष स्थानमा रहेको छ। सिटीले पहिलो खेलमा आर्सनललाई २-० ले हराएको थियो। यता हडर्सफिल्डको यो लगातार दोस्रो हार हो।