अर्जेन्टिनको बोका जुनियर्सलाई हराउँदै बार्सिलोनाले जोन गेम्पर ट्रफ्रीको उपाधि जितेको छ।
बुधबार राति भएको खेलमा घरेलु टोली बार्सिलोनाले अर्जेन्टिनाको बोका जुनियर्सलाई ३-० गोल अन्तरले हराउँदै जोन गेम्पर ट्रफ्री जितेको हो ।
नाउ क्याम्पमा भएको खेलमा बार्सिलोनालाई जिताउन मेसी, माल्कोम, रिफान्हाले एक-एक गोल गरे ।
पहिलो हाफमै दुई गोलले अग्रता लिएको बार्सिलोनाले दोस्रो हाफमा थप एक गोल गर्यो।
खेलको १८ औं मिनेटमा माल्कोमले गोल गर्दै बार्सिलोनालाई सुरुवाती अग्रता दिलाएका थिए। यसै सिजन क्लब आएका माल्कोमको यो डेब्यू गोलसमेत हो।
यस्तै खेलको ३९ औं मिनेटमा कप्तान मेसीले गोल गर्दै बार्सिलोनालाई २-० को अग्रतामा पुर्याए।
दोस्रो हाफको ६७ औं मिनेटमा रिफान्हाले गोल गर्दै बार्सिलोनालाई ३-० को सहज जित दिलाए ।
स्पेनिस ला लिगाको नयाँ सिजनअघि बार्सिलोनाले मैत्रीपूर्ण फुटबल अन्तर्गत जोन गेम्पर ट्रफ्रीको आयोजना गर्नेगर्छ।
