भुटानमा जारी साफ अन्डर १५ महिला च्याम्पियनसिपमा भारतले विजयी सुरूवात गरेको छ।
थिम्पुस्थित चालिमिथाङ मैदानमा बिहिबार भएको उद्घाटन खेलमा भारतले श्रीलंकालाई १२–० गोल अन्तरले पराजित गर्दै उत्कृष्ट सुरूवात गरेको हो।
पहिलो हाफमा ६ गोल गरेको भारतले दोस्रो हाफमा थप ६ गोल थपेको थियो।
यस्तै बिहिबारै भएको समूह बीको पहिलो खेलमा डिफेन्डिङ च्याम्पियन बंगलादेशले पाकिस्तानविरूद्ध १४-० गोल अन्तरले जित निकालेको छ। पहिलो हाफमा ६ गोल गरेको बंगलादेशले दोस्रो हाफमा ८ गोल गरेको थियो।
दोस्रो संस्करणको यु १५ च्याम्पियनसिप भुटानमा सुरू भएको हो। प्रतियोगिता अन्तर्गत नेपालले आफ्नो पहिलो खेल शनिबार पाकिस्तानसँग खेल्दैछ।
नेपालले समूह चरणको दोस्रो खेलमा सोमबार बङ्गलादेशसँग खेल्नेछ। दुई समूहमा बाँडिएको प्रतियोगिताको अर्को समूहमा भारत, श्रीलंका र घरेलु टोली भुटान छन्।
समूहबाट शीर्ष दुई सेमिफाइनलमा पुग्नेछन्।
