जर्मनीका मिडफिल्डर मेसुट ओजिलले अन्तर्राष्ट्रिय फुटबलबाट सन्यास लिएका छन्।
इंग्लिस क्लब आर्सनलबाट व्यावसायिक फुटबल खेल्दै आएका ओजिलले आइतबार राति एक विज्ञप्ति निकाल्दै सन्यासको घोषणा गरेका हुन्।
भारी हृदय, धेरै सोचविचार र पछिल्लो घटनाक्रमले आफू जर्मनीबाट अन्तर्राष्ट्रिय खेल नखेल्ने निर्णय गरेको उनले विज्ञप्तिमा भनेका छन्।
पछिल्लो समय रूसमा सम्पन्न विश्वकपमा सोचेअनुसारको प्रदर्शन गर्न नसकेपछि जर्मनीसहित उनले आलोचना खेपेका थिए।
डिफेन्डिङ च्याम्पियन जर्मनी रूस विश्वकपमा समूह चरणबाटै बाहिरिएको थियो।
विश्वकपअघि टर्कीका राष्ट्रपतिलाई भेटेपछि उनी आलोचित बनेका थिए। टर्किस मूलका ओजिललाई टर्कीको समर्थन गरेको आरोप लाग्दै आएको थियो। त्यतिबेला टर्किस मूलका अर्का खेलाडी इकेई गन्डोगनले पनि टर्कीका राष्ट्रपतिलाई भेटेका थिए। तर जर्मनीको फुटबल एसोसिएसनले ओजिलसँग मात्र स्पष्टिकरण सोधेको थियो।
यस्तै विश्वकपमा उनको प्रदर्शनलाई लिएर पनि आलोचना भईरहेको थियो। यसैबीच उनले अन्तर्राष्ट्रिय फुटबलबाट सन्यास लिएका हुन्।
ओजिलले आफ्नो लागि यो निर्णय निकै कठिन भएको भन्दै एक उत्साह र गर्वका साथ जर्मनीको जर्सी लगाउने गर्थे। तर, अब नलगाउने बताएका हुन्।
‘यो निर्णय मेरो लागि कठिन हो किनभने मेरो टिममेट, प्रशिक्षक र जर्मनीका असल जनताले मलाई सबै दिएका थिए,' उनले भनेका छन्।
सन् २००९ मा जर्मनीको राष्ट्रिय टोलीबाट डेब्यू गरेका २९ वर्षीय ओजिलले ९२ अन्तर्राष्ट्रिय खेलबाट २३ गोल गरिसकेका छन्।
सन् २०१४ को विश्वकप जित्दा जर्मनीका मुख्य खेलाडी रहेका ओजिल पाँच पटकसम्म जर्मन प्लेयर अफ दि इयर भएका थिए।
जर्मनीबाट ओजिलले सन् २०१२ र २०१६ को युरोकप समेत खेलेका थिए।