क्रिष्टियानो रोनाल्डोले नयाँ क्लब युभेन्ट्सको जर्सी सार्वजनिक गरेका छन्।
पोर्चुगिज स्टार क्रिष्टियानो रोनाल्डोलाई इटालियन क्लब युभेन्टसले खेलाडीको रुपमा सार्वजनिक गरे पछि उनले आफूले लगाउने ७ नम्बर जर्सी सार्वजनिक गरेका हुन्।
सोमबार राति भएको पत्रकार सम्मेलनमार्थत रोनाल्डो पहिलो पटक युभेन्ट्सको जर्सीसहित सार्वजनिक भएका हुन्।
युभेन्टसले रोनाल्डोलाई यसै साता १०५ मिलियन पाउण्डमा स्पेनिस क्लब रियल मड्रिडबाट क्लबमा भित्राएको थियो ।
क्लबसंग औपचारिक सम्झौता नभए पनि रोनाल्डोले युभेन्ट्सबाट हरेक सिजन ३० मिलियन पाउण्ड पाउनेगरी चार बर्षको लागि अनुबन्ध गरिएको हो।
पोर्चुगिज स्टार क्रिष्टियानो रोनाल्डो आफू नयाँ चुनौतीको सामना गर्न इटालियन क्लब युभेन्ट्समा आवद्ध भएको स्पष्ट पारेका छन्।
युभेन्ट्ससँग नयाँ सम्झौता गर्न टुरिन पुगेका रोनाल्डोले सोमबार पत्रकार सम्मेलनमा बोल्दै आफू करियरको अर्को चुनौतीको सामना गर्न इटाली आएको बताएका हुन्।
युभेन्ट्स विश्वको उत्कृष्ट क्लब भएको दाबी गर्दै रोनाल्डोले आफू यहाँ आउनु करियरको महत्वपूर्ण कदम भएको बताए।
‘मलाई अझै चुनौतीको सामना गर्न मन लाग्छ । म मेरो करियरको अर्को चुनौतीको समाना गर्न यहाँ आएको छु,' रोनाल्डोले भने ।
रोनाल्डोले आफू छुट्टी मनाउन र रिटायर्ड खेल जीवन बिताउन इटाली नआएको स्पष्ट पार्दै क्लबलाई उपाधि दिलाएर छोड्ने दाबी गरे।
'मलाई युभेन्ट्सले अवसर दिएको छ । म क्लबप्रति आभारी छौ । म जित्न चाहन्छु, म यहाँ उत्कृष्ट हुन चाहन्छु।’
सन् २००९ मा इन्ग्लिश क्लब म्यानचेस्टर युनाइटेडबाट कीर्तिमानी मूल्यमा क्लब आएका रोनाल्डोले रियलसंगको अनुबन्ध सम्झौता ३ बर्ष बाँकी छदै युभेन्ट्स गएका हुन्। ९ वर्ष रियलमा बिताएका रोनाल्डोले गत सिजन सन् २०२१ सम्मको लागि सम्झौता गरेका थिए।
३३ वर्षीय रोनाल्डो रियल मड्रिडका सर्वाधिक गोलकर्ता हुन्। रियलका लागि रोनाल्डोले ४३८ खेलमा रोनाल्डोले ४५० गोल गरेका छन्।
पाँच पटकको बालोन डी'ओर बिजेता रोनाल्डोले रियललाई चार पटक च्याम्पियन्स लिग जिताउन महत्वपूर्ण भूमिका खेलेका छन् । रोनाल्डोले सन् २००८,१३, १४ र १६ मा बालोन डी'ओर जितेका थिए ।
रोनाल्डोले रियलबाट च्याम्पियन्स लिगको एकै सिजन १७ गोल गरेर नयाँ किर्तिमान बनाएका थिए । सन् २०१३-१४ को सिजन उक्त किर्तिमान बनाएका उनले च्याम्पियन्स लिगमा कुल १०५ गोल गर्न सफल भए । रोनाल्डोले ला लिगामा मात्र ३११ गोल गरे । रियलबाट कुल ४४ ह्याट्रिक गरेका रोनाल्डोले ला लिगामा मात्र ३४ ह्याट्रिक गर्दै नयाँ किर्तिमान कायम गरेका थिए ।
रोनाल्डोले रियलमा रहदा १६ मुख्य उपाधि हात पारे। जसमा ४ च्याम्पियन्स लिग, २ ला लिगा, ३ क्लब विश्वकप र ३ युरोपियन सुपर कप,दुई स्पेनिस सुपर कप र २ कोपा डेल रे रहेको छ ।
रोनाल्डोले रियलका लागि ४५०, म्यानचेस्टर युनाइटेडका लागि ११८, पोर्चुगलका लागि ८५ र स्पोर्टिङ लिस्बोनको लागि ५ गोल गर्दै करियरको ६५० गोल पुरा गरेका हुन्।
