स्पेनका प्रशिक्षक जुलियन लोपेतेगीलाई रियल मड्रिडले क्लबको नयाँ प्रशिक्षकमा नियुक्त गरेको छ।
रसियामा आयोजना हुने विश्व कप फुटबल पछि ५१ वर्षे लोपेटेगुइले रियलको कमान सम्हाल्ने बताइएको छ । उनी र क्लबबीच तीन वर्षको सम्झौता भएको छ ।
उनले विश्वकप फुटबलपछि रियल मड्रिडको जिम्मेवारी सम्हाल्ने छन् ।
सन् २०२० को युरोपियन च्याम्पियनसिपका लागि स्पेनको प्रशिक्षकका रुपमा सम्झौता गरेको केहि सातापछि उनले रियलसँग सम्झौता गरेका छन् ।
लोपेतेगीले सन् २०१६ को जुलाईमा स्पेनको राष्ट्रिय टिमको जिम्मेवारी सम्हाल्नु पूर्व पोर्टोमा दुई वर्ष बिताएका थिए ।
पूर्व गोलरक्षक लोपेतेगीले रियल मड्रिडको सिनियर टिमबाट एक पटक खेलेका छन्। उनले लोग्रोनेसबाट भने १०७ खेल खेलेका थिए ।
उनले सन् २००३ मा स्पेनको १७ वर्षमुनिको टिममा सहायक प्रशिक्षकको रुपबाट आफ्नो प्रशिक्षकको करिअर सुरु गरेका थिए । त्यसपछि उनले स्पेनको १९ वर्षमुनि, २० वर्षमुनि र २१ वर्षमुनिको टिममा प्रशिक्षकको भूमिका खेले । त्यसपछि उनी पोर्टो गएका थिए ।
जिनेदिन जिदानले मे महिनामा पदबाट राजीनामा दिएपछि रियल मड्रिड नयाँ प्रशिक्षकको खोजीमा थियो। जिदानले रियल मड्रिडमा साढे दुई वर्ष बिताए र क्लबलाई तीनपटक लगातार युरोपियन च्याम्पियन बनाए ।
तेस्रो पटक च्याम्पियन्स लिगको उपाधि दिलाएको हप्ता दिन नबित्दै जिदानले राजीनामा दिएका थिए।