दक्षिण अफ्रिकाले बंगलादेशविरुद्धको पहिलो टि – ट्वान्टी क्रिकेटमा जीत निकालेको छ। बिहिबार राति घरेलु मैदानमा भएको पहिलो खेलमा दक्षिण अफ्रिकाले बंगलादेशलाई २० रनले हराउँदै शृंखलामा विजयी सुरूवात गरेको हो।
दक्षिण अफ्रिकाले दिएको १९६ रनको लक्ष्यसहित जवाफी ब्याटिङ्ग गरेको बंगलादेशले पुरै २० ओभर खेल्दै ९ विकेट गुमाएर मात्र १७५ रन मात्र बनाउन सक्यो। बंगलादेशको लागि सौम्य सरकारले ४७ तथा मोहमद सैफुदीनले अविजित ३९ रन बनाए ।
यस्तै सब्बिर रहमानले १९ र मेहिदी मिराजले १४ रन जोडे । बंगलादेशलाई सस्तैमा समेट्ने क्रममा दक्षिण अफ्रिकाका डेन पिटरसन, एन्डिले लक्की,बेउरिन हेन्ड्रिक र रोब्बी फ्राईलिंच्कले समान दुई दुई विकेट लिए ।
यसअघि टस जितेर पहिले ब्याटिङ्ग गरेको दक्षिण अफ्रिकाले पुरै २० ओभरमा ४ विकेट गुमाएर १९५ रन बनाएको थियो। दक्षिण अफ्रिकाका लागि क्विन्टन डी ककले ५९ रनको अर्धशतकीय पारी खेले । त्यस्तै एबी डी भिलियर्स ले ४९ रन जोड्दा फरहान बेहार्डीनले अविजित ३६ रन जोडे । बंगलादेशका मेहिदी मिराजले दुई विकेट लिए ।
यो जितसँगै दक्षिण अफ्रिकाले बंगलादेशबिरुद्ध दुई खेलको टि – ट्वान्टी सिरिजमा १ – ० ले अग्रता बनाएको छ। यसअघि पाहुना टोलिसंगको ३ खेलको एकदिवसीय सिरिजमा दक्षिण अफ्रिकाले ३ – ० क्लिन स्विप गरेको थियो ।
