मलेसियामा जारी एसिसी यू–१९ पूर्वी क्षेत्रीय प्रतियोगिताको उपाधिका लागि अहिले नेपालले हङकङसँग भिडिरहेको छ। मलेसियाको किन्नारा ओभलमा टस जितेर नेपाल पहिले बलिङ गर्ने निर्णय गरेको छ।
पहिलो ओभरमै नेपाललाई सफलता दिलाउने क्रममा ओपनर बलर अनिलकुमार साहले पाक कपुरलाई शून्यमै आउट बनाए।
यसअघि शनिबार मलेसियालाई १० विकेटको फराकिलो अन्तरमा हराएर नेपाल फाइनलमा पुगेको थियो। यस्तै सिंगापुरलाई हराउँदै हङकङले नेपालसँगको भीडन्त पक्का गरेको थियो।
एसिसीको यू–१९ प्रतियोगितामा नेपाल सातौं पटक फाइनलमा पुगेको हो। यसअघि नेपालले ६ पटक फाइनलमा प्रतिस्पर्धा गरेको छ। ६ मध्ये नेपालले चार पटक उपाधि जितेको छ भने २ पटक उपविजेतामै सीमित बनेको छ। उत्कृष्ट फर्ममा रहेको नेपालले आज हङकङलाई पराजित गर्न सके प्रतियोगितामा पाँचौ पटक उपाधि जित्नेछ।
नेपाल सन् १९९९ को एसिसी यू–१९ एलिट कपको फाइनलमा पुगेको थियो। सिंगापुरमा भएको फाइनलमा नेपाललाई बंगलादेशले ६ विकेटले हराएको थियो। २००१ को फाइनलमा नेपालले मलेसियालाई ७ विकेटले हराएर उपाधि जितेको थियो। लगातार चार पटक उपाधि जित्ने क्रममा नेपालले सन् २००३ मा मलेसियालाई ३० रनले, सन् २००५ मा मलेसियालाई नै ७ विकेटले र २००७ मा अफगानिस्तानलाई ४८ रनले हराएर उपाधि जितेको थियो।
सन् २००९ को फाइनलमा पुग्न नसकेको नेपाल २०११ को प्रतिस्पर्धामा फाइनलमा पुग्यो। तर नेपाललाई अफगानिस्तानले ६१ रनले हराएर उपाधि जित्यो।
सन् २०१४ को एसिसी यू–१९ प्रिमियर लिगमा भने राउन्ड रोबिनको आधारमा भयो। प्रतियोगितामा नेपाल दोस्रो स्थानमा सीमित बनेको थियो। अफगानिस्तानले नेपाललाई पछि पारेर उपाधि जितेको थियो। २०१५ मा पनि नेपाललाई अंक तालिकामा पछि पारेर अफगानिस्तान च्याम्पियन बनेको थियो।
