पवन सरार्फले सर्वाधिक ६ विकेट लिएपछि मलेसियामा जारी एसीसी यू–१९ एसिया कप छनोट अन्तर्गत समूह चरणको अन्तिम खेलमा नेपालले सिंगापुरलाई ६७ रनमा अलआउट बनाएको छ।
क्लब अमानमा टस जितेर पहिले ब्याटिङ गरेको सिंगापुरले निर्धारित ५० ओभरको खेलमा २८.३ ओभरमा अलआउट हुँदै ६७ रन बनायो।
सिंगापुरलाई सस्तैमा समेट्ने क्रममा नेपालका पवन सरार्फले ८ ओभर बलिङ गर्दै ४ मेडन राखी१२ रन खर्चिएर ६ विकेट लिए। किशोर महतोले २ विकेट लिए भने कप्तान दीपेन्द्र सिंह ऐरी र सन्दिप लामिछानेले १-१ विकेट लिए।
सिंगापुरका सिद्धान्त र आर्यमान सुनिलले समान २० रन बनाउनुबाहेक अन्यले राम्रो खेल्न सकेनन्।
सेमिफाइनलमा स्थान पक्का बनाइसकेको सिंगापुर नेपाली टोलीका लागि सबैभन्दा कठिन प्रतिद्वन्द्वी हो।
अघिल्ला दुई खेलमा जित निकाल्दै सेमिफाइनलमा पुगिसकेको नेपाल सिंगापुरलाई पराजित गर्दै समूह बिजेता बन्न चाहन्छ। समूह ए को नेपालले पहिलो खेलमा थाइल्याण्डलाई २५५ रनले पराजित गरेको थियो । त्यस्तै दोस्रो खेलमा नेपालले भुटानलाई ९ विकेटले पराजित गरेको थियो ।
दुई खेलमा ४ अंक जोडेको नेपाल समूहको शीर्ष स्थानमा छ । यता, सिंगापुर पनि दुई खेलमा अपराजित छ। सिंगापुरले थाइल्याण्डलाई ९२ रनले र भुटानलाई ९ विकेटले पराजित गरेको थियो। सिंगापुरको पनि ४ अंक छ तर, नेट रनरेटको आधारमा सिंगापुर नेपाल भन्दा पछि छ।
छनोटको समूह बी मा चीन, मलेसिया, हङकङ र म्यानमार छन् । फाइनलमा पुग्ने दुई टोली एसिया कपको लागि छनोट हुनेछन् ।
