शिखर धवनले सतक बनाएसँगै पहिलो एकदिवसीय क्रिकेटमा भारतले श्रीलंकालाई ९ विकेटले हराएको छ।
जितसँगै भारतले पाँच म्याचको श्रृंखलामा १–० ले अग्रतासमेत लिएको छ।
श्रीलंकाको दामुल्लास्थित रनगिरी दामुल्ला मैदानमा टस जितेर घरेलु टोलीलाई पहिले व्याटिङको निम्तो दिएको भारतले श्रीलंकालाई २१६ रनमा समेट्यो।
निर्धारित ५० ओभरको खेलमा श्रीलंका ४३ दशमलव २ ओभरका नै अल आउट भएको थियो। उसका लागि निरोशन डिकवेलाले सर्वाधिक ६४ रनको योगदान दिए। श्रीलंकालाई कम स्कोरमा रोक्न भारतका अक्सर पटेलले ३ तथा केदार जाधव, जसप्रित बुम्राह र युजभेन्द्र चाहलले समान २-२ विकेट लिए।
२१७ रनको सामान्य लक्ष्य पाएको भारतले मात्र एक विकेट गुमाएर लक्ष्य भेट्टायो। शिखर धवन र कप्तान विराट कोहलीबिच दोस्रो विकेटका लागि नटआउट १ सय ९७ रनको साझेदारी हुँदा भारत पहिलो एक दिवसीयमा विजयी भएको हो।
भारतका शिखर धवनले ७१ बलमा नै एक सय रन बनाउँदै शतक पूरा गरेका छन् । उनले १६ चौका र दुई छक्का हानेका थिए। आफ्नो खेल जीवनमा उनले यो ११ औँ एकदिवसीय शतक पूरा गरेका हुन्। यो सँगै उनी श्रीलंका विरुद्धको खेलमा सबैभन्दा छिटो शतक बनाउने खेलाडी पनि बनेका छन्।
खेल अविधिभर भने उनले ९० बलमा १३२ रनको योगदान दिए। त्यस्तै क्याप्टेन विराट कोहलीले ७० बलमा ८२ रन बनाए भने रोहित शर्माले १३ बल खेलेर मात्र ४ रन जोडे।
श्रीलंका भ्रमणमा रहेको भारतले यसअघि ३ टेस्ट म्याचको श्रृङ्खला क्लिनस्वीप गरेको थियो ।अब भारत र श्रीलंकाले ४ वटा एकदिवसीय र एउटा ट्वेन्टी ट्वेन्टी खेल्नेछन्।