पाकिस्तानका एक क्रिकेटरको बलले लागेर मृत्यु भएको छ। पाकिस्तानको मार्दनमा क्लब क्रिकेट म्याचको क्रममा हेलमेट नलाइ ब्याटिङ गरिरहेका क्रिकेटर जुबेर अहमदको बलले लागेर मृत्यु भएको हो।
खैबर पख्तुन्ख्वा प्रान्तको मार्दनमा सोमबार भएको खेलको क्रममा अहमदलाई बलले टाउकोमा लागेको पाकिस्तानी पत्रिका टाइम्स अफ इस्लामाबादले जनाएको छ। बलले लागे लगतै अहमदलाई अस्पताल लगिएको थियो। अस्पतालले उनलाई मृत घोषणा गरेको थियो।
पाकिस्तान क्रिकेट बोर्डले आफ्नो ट्वीटर ह्याण्डलमार्फत अहमदको निधनबारे पुष्टी गरेको छ। बोर्डले एक ट्विट गर्दै परिवार तथा खेलाडी तथा समर्थकप्रति समवेदना प्रकट गरेको छ। यसैबीच बोर्डले अब हुने सबै खेलमा अनिवार्य रूपमा हेलमेट प्रयोग गर्न पनि खेलाडीलाई आह्वान गरेको छ।
