हैदराबादको पहिलो हार, मुम्बईले ८ बल खेल्न बाँकी रहँदै खेल जित्यो

हैदराबादको पहिलो हार, मुम्बईले ८ बल खेल्न बाँकी रहँदै खेल जित्यो


पहिलो खेलमा पराजय भोगेर दशौं आइपिएलको सुरुवात खराब ढंगले गरेको मुम्बई इन्डियन्सले लगातार दोस्रो खेल पनि जितेको छ। बुधबार राती आफ्नो घरेलु मैदानमा भएको तेस्रो खेलमा मुम्बईले अपराजित सनराइजर्स हैदराबादलाई ८ बल खेल्न बाँकी रहँदा ४ विकेटले पराजित गर्यो। आइपिएलमा हैदराबादको यो पहिलो हार हो।

टस जितेर हैदराबादलाई ब्याटिङको निम्तो दिएको मुम्बईका बलरले कसिलो बलिङ गरे। कप्तान डेभिड वार्न (४९) र शिखर धवन (४८) ले ८१ रनको साझेदारी गर्नु बाहेक हैदराबादका लागि अन्य कुनै ब्याट्सम्यानले ठोस ब्याटिङ गर्न सकेनन्।

मुम्बईका अनुभवी बलर हरभजन सिंहले २ विकेट झारेर हैदराबादलाई दबाबमा राखेका थिए। बाँकी काम जसप्रित बुमराले गरे। उनले ३ विकेट लिए। हैदराबादले पहिलो इनिङमा ८ विकेट गुमाउदै १ सय ५८ रनको कमजोर योगफल बनायो।

प्रतिउत्तरमा कमजोर सुरुवात गरे पनि कोलकाता नाइटराइडर्सलाई पराजित गर्न उत्कृष्ट ब्याटिङ गरेका नितेश राणाले मध्यक्रममा फेरि आफ्नो ब्याटिङको जादू देखाए। उनले २ छक्का र ३ चौकाको सहयोगले ३६ बलमा ४५ रन बनाए। छिटो विकेट गुमाएको मुम्बईका लागि नितेशले संयमित भएर ब्याटिङ गरे। उनी संयमित बन्दा मध्य क्रमका अर्का ब्याट्सम्यान क्रुनाल पाण्ड्याले आक्रामक बन्ने मौका पाएका थिए। क्रुनालले ३ छक्का र ३ चौकाको सहयोगले २० बलमा ३७ रन बनाए।

यसअघि प्रारम्भिक ब्याट्सम्यान पार्थिव पटेलले ७ चौकाको सहयोगले ३९ रन बनाएका थिए। हैदराबादबाट खेलिरहेका अफगानी स्पिनर राशिद खानले आज पनि ४ ओभरमा १९ रन मात्र खर्चिदै १ विकेट लिए।

उनले कप्तान रोहित शर्मालाई गुगलीको धरापमा पारे। उनी दक्षिण अफ्रिकाका इमरान ताहिरसँगै सर्वाधिक विकेट लिने खेलाडीमा शीर्ष स्थानमा छन्। दुवैले ३ खेलमा ६ विकेट लिएका छ्न्।

हैदराबादबाट सबैभन्दा सफल बलर भुवनेश्वर कुमार बने। उनले ४ ओभरमा २१ रन खर्चेर ३ विकेट लिएका थिए। खेलको म्यान अफ दि म्याच बुमरालाई घोषित गरियो।

Share:

© 2017 Setopati Sanchar Pvt. Ltd.