आइपिएल २०२६ मा सनराइजर्स हैदराबादले मुम्बई इन्डियन्समाथि ऐतिहासिक जित निकालेको छ। मुम्बईले दिएको २४४ रनको लक्ष्य हैदराबादले ४ विकेटको क्षतिमा ८ बल बाँकी छदा पार गरेर कीर्तिमानी प्रदर्शन गर्यो।
खेलमा मुम्बईका रायन रिकेल्टनले ५५ बलमा नटआउट १२३ रन बनाउँदा हैदरावादका ट्राभिस हेडले ३० बलमा ७६ रन तथा हेनरिक क्लासेनले ३० बलमा नटआउट ६५ रन बनाए।
खेलमा बनेका केही रोचक र ऐतिहासिक तथ्यांक यस्ता छन्।
कीर्तिमानी लक्ष्यको सफलता
सनराइजर्स हैदराबादले २४४ रनको विशाल लक्ष्य पछ्याएर जित हासिल गर्यो। यो आईपीएल इतिहासकै चौथो ठूलो 'चेज' (लक्ष्य पछ्याएर गरिएको जित) हो। साथै, मुम्बईको वानखेडे स्टेडियममा कुनै पनि टी-२० खेलमा पछ्याइएको यो अहिलेसम्मकै सबैभन्दा ठूलो लक्ष्य हो।
छक्काको वर्षा
बुधबारको यस खेलमा कुल ३२ वटा छक्का प्रहार भए। वानखेडे स्टेडियममा भएको कुनै पनि आईपीएल खेलमा यो सबैभन्दा धेरै छक्काको रेकर्ड हो। यस सिजनको आईपीएलमा धेरै छक्का प्रहार भएको खेलहरूमध्ये यो संयुक्त रूपमा दोस्रो स्थानमा पर्दछ।
पावरप्लेको आक्रामक ब्याटिङ
दुवै टोलीले सुरुवाती ६ ओभर (पावरप्ले) मा कुल १७० रन बनाए। हैदराबादले ९२ र मुम्बईले ७८ रन जोडेका थिए। मुम्बईले पावरप्लेमा ९२ रन खर्चिनु उसको इतिहासकै सबैभन्दा खराब बलिङ रेकर्ड हो।
जसप्रित बुमराहको खराब दिन
विश्वकै उत्कृष्ट बलर मानिने जसप्रित बुमराहले यस खेलमा ५४ रन खर्चिए। यो सिजन उनको प्रदर्शन निकै निराशाजनक रहेको छ। उनले ३० ओभर बलिङ गर्दा जम्मा २ विकेट लिएका छन् र उनको बलिङ औसत १३२ रन रहेको छ, जुन आईपीएल इतिहासमै कुनै पनि बलरको सबैभन्दा खराब तथ्याङ्क हो।
मुम्बई इन्डियन्सको अनौठो संयोग
मुम्बईले पहिले ब्याटिङ गर्दै बनाएको २४३ रन उसको इतिहासकै उच्च स्कोर हो। तर, एउटा दुखद संयोग के छ भने मुम्बईले बनाएका अहिलेसम्मका तीनवटै उच्च स्कोरहरूमा उसले हार नै बेहोर्नुपरेको छ।
रायन रिकेल्टनको नयाँ कीर्तिमान
मुम्बईका ब्याटर रायन रिकेल्टनले १२३ रनको सानदार इनिङ खेले। यो मुम्बई इन्डियन्सका कुनै पनि खेलाडीले बनाएको अहिलेसम्मकै उच्च व्यक्तिगत रन हो। उनले सन् २००८ मा सनथ जयसूर्याले बनाएको ११४ रनको रेकर्ड तोडेका हुन्।
हैदराबादको १००औँ जित
यो खेल जितेसँगै सनराइजर्स हैदराबाद आईपीएलमा १०० खेल जित्ने आठौँ टोली बनेको छ।
