अमेरिकी क्रिकेट टोलीका प्रमुख ब्याटर आरोन जोन्समाथि फिक्सिङको गम्भीर आरोप लागेको छ।
अन्तर्राष्ट्रिय क्रिकेट परिषदले ३१ वर्षीय जोन्सलाई 'एन्टी-करप्सन कोड' (भ्रष्टाचार विरुद्धको नियम) का ५ वटा बुँदाहरू उल्लंघन गरेको आरोप लगाउँदै तत्काल लागू हुने गरी क्रिकेटका सबै गतिविधिबाट निलम्बन गरेको छ।
उनलाई यी आरोपहरूको जवाफ दिन १४ दिनको समय दिइएको छ।
सन् २०२६ को टी-२० विश्वकपको तयारीका लागि जोन्स श्रीलंकामा भइरहेको तयारीमा अमेरिकी टोलीमा सहभागी छन्। तर, यो निलम्बनसँगै उनी अब विश्वकपका लागि छनोट हुन पाउने छैनन्।
सन् २०२३-२४ मा बार्बाडोसमा भएको 'बिम १०' प्रतियोगितामा म्याच फिक्सिङ गर्न खोजेको वा खेलको नतिजालाई अनुचित प्रभाव पार्न खोजेको उनलाई आरोप लागेको हो।
फिक्सिङका लागि आएका प्रस्तावहरूको जानकारी समयमै क्रिकेट बोर्डलाई नदिएको तथा भ्रष्टाचार सम्बन्धी अनुसन्धानमा असहयोग गरेको र प्रमाणहरू लुकाउन वा नष्ट गर्न खोजेको पनि आइसिसीको भनाइ छ।
जोन्स अमेरिकाका प्रभावशाली खेलाडी हुन्। उनले सन् २०२४ को टी-२० विश्वकपमा क्यानडाविरुद्ध ९४ र पाकिस्तानविरुद्ध ३६ रनको अविजित पारी खेलेर अमेरिकालाई ऐतिहासिक जित दिलाउन महत्त्वपूर्ण भूमिका खेलेका थिए। उनले अमेरिकाका लागि ५२ एकदिवसीय र ४८ टी-२० अन्तर्राष्ट्रिय खेल खेलेका छन्।
आईसीसीका अनुसार यो एउटा ठूलो अनुसन्धानको हिस्सा हो र आगामी दिनमा यस प्रकरणमा संलग्न अन्य खेलाडीहरूलाई पनि कारबाही हुन सक्ने सम्भावना छ।
-1746009348.jpg)
