आइसिसी टी-२० विश्वकपमा अफगानिस्तानले न्युजिल्याण्डलाई १६० रनको लक्ष्य दिएको छ।
शनिबार बिहान भएको खेलमा टस हारेर पहिले ब्याटिङ गरेको अफगानिस्तानले ६ विकेट गुमाएर १५९ रन बनाएको हो।
अफगानिस्तानका लागि दुई ओपनरले उत्कृष्ट प्रदर्शन गरे। ओपनर रहमानउल्लाह गुर्बाजले ८० र इब्राहिम जद्रानले ४४ रन बनाए।
गुर्बाजले ५६ बलमा ५ चौका र ५ छक्का प्रहार गरे भने इब्राहिम जद्रानले ४१ बलमा ३ चौका र २ छक्का प्रहार गरे।
अज्मतउल्लाह ओमरजइले १३ बलमा १ चौका र १ छक्का प्रहार गरी २२ रन बनाए। अन्य ब्याटरले दोहोरो अंकमा रन बनाउन सकेनन्।
बलिङतर्फ न्युजिल्याण्डका ट्रेन्ट बोल्ट र म्याट हेनरीले २/२ तथा लोकी फर्गुशनले एक विकेट लिए। ।
जवाफी ब्याटिङ गर्ने क्रममा न्युजिल्याण्डका ओपनर फिन एलेन गोल्डेन डक भएका छन्। उनलाई अफगानिस्तानका फजलहक फारूकीले बोल्ड गरेका हुन्।
पहिलो विकेटपछि कप्तान केन विलियमसन र डेभन कनवे ब्याटिङमा छन्।
