प्रधानमन्त्री कप एकदिवसीय राष्ट्रिय क्रिकेट प्रतियोगितामा नेपाल एपिएफ क्लबले विजयी सुरूवात गरेको छ।
आइतबार कीर्तिपुरस्थित त्रिवि मैदानमा भएको खेलमा एपिएफले बागमती प्रदेशलाई ८९ रनले पराजित गरेको हो। शनिबार पुलिससँग पराजित भएको बागमतीले लगातार दोस्रो खेलमा हार बेहोर्यो।
आइतबार एपिएफले दिएको २४२ रनको लक्ष्य पछ्याएको बागमती ४२.५ ओभरमा १५२ रनमै अलआउट भयो।
बागमतीका लागि ओपनर आशुतोष घिराइयाले ४१ रन जोड्दा अर्का ओपनर इशान पाण्डे शून्यमा आउट भए। कप्तान रित गौतमले ८९ बलमा ८ चौकाको मद्दतमा ६० रन जोडे। यस्तै रविन जोशीले नटआउट २० रन जोडे।
बलिङमा एपिएफका कप्तान रोहित पौडेलले ४ विकेट लिए। उनले ९ ओभरमा १ मेडन राख्दा २६ रन खर्चिए। अभिनास बोहरा र मौसम ढकालले २-२ विकेट लिन सफल भए।
त्यसअघि एपिएफले सन्दीप जोराको शतकमा ९ विकेटको क्षतिमा २४१ रन जोड्यो। टस जितेको बागमतीले फिल्डिङ रोजेपछि पहिले ब्याटिङ गरेको एपिएफका लागि सन्दीपले टिम खराब स्थितिमा रहेको बेलामा शतक प्रहार गरेका हुन्।
अन्तिम ओभरमा रनआउटको सिकार हुनुअघि उनले ११२ रन जोडे। उनले ११७ बल खेल्दा ७ चौका र ५ छक्का प्रहार गरे।
१२.४ ओभरमा ५ विकेट गुमाउँदा एपिएफले ४१ रन मात्र जोडेको थियो। त्यसपछि सन्दीपले एपिएफलाई धैर्यताका साथ अघि बढाएका थिए।
प्रधानमन्त्री कपमा यो दोस्रो शतक हो। यसअघि नेपाल पुलिस क्लबका रासिद खानले बागमतीविरुद्ध नै शनिबार शतक प्रहार गरेका थिए।
आइतबार बागमतीविरूद्ध एपिएफका ओपनरद्वय प्रज्जल शाही १० रन र आसिफ शेख १५ रनमा आउट भए। यो सिजनदेखि एपिएफमा आबद्ध भएका कप्तान रोहित पौडेल २ रनमा रिजन ढकालको एलबिडब्लूको धरापमा परे।
सुमित महर्जन ६ रन र पुरन विक शून्यमा आउट भए। यस्तै लोकेश बमले २७ रन, भूवन कार्कीले १० रन र अमरसिंह रटेउलाले २२ रन बनाए। अभिनास बोहराले नटआउट १८ रन जोडे।
बलिङमा बागमतीका सूर्य तामाङले ३ विकेट लिए। उनले १० ओभरमा ३२ रन खर्चिए। प्रतिश जिसी र रिजन ढकालले २-२ विकेट लिए भने सोनु देवकोटाले १ विकेट हात पारे।
