नेपाल क्रिकेट संघ (क्यान) को मंगलबार चितवनमा बसेको बोर्ड बैठकबाट अनुमोदित पुरुष तथा महिला क्रिकेट खेलाडीको वर्गीकरणमा विभेद देखिएको छ।
राष्ट्रिय टिमका लागि खेलेको आधारमा सन् २०२० का लागि ए, बी र सी गरी तीन श्रेणीमा क्रिकेटरलाई वर्गीकरण गरिएको छ। जसमा १८ जना पुरुष खेलाडी छन् भने १९ जना महिला खेलाडी छन्। वर्गीकरणमा परेका क्रिकेटरले मासिक रुपमा तलब पाउनेछन्।
पुरुष खेलाडी वर्गीकरणमा स्पिनर बसन्त रेग्मी ए श्रेणीमा फर्किएका छन्। यसअघि उनलाई सन् २०१९ को वर्गीकरणमा बी श्रेणीमा झारिएको थियो।
सन् २०२० मा बसन्तले राष्ट्रिय टिमका लागि कुनै पनि खेलेका छैनन्। गत मंसिरमा भएको १३औं सागमा बसन्त राष्ट्रिय टिममा समावेश भएका थिएनन्।
तीव्र गतिका बलर सोमपाल कामी ए श्रेणीबाट बी श्रेणीमा झारिएका छन्। सोमपाले सागमा भारत, बंगलादेश र श्रीलंकाकोविरुद्ध खेलेका थिए। विगत लामो समयदेखि राष्ट्रिय टिममा रहेका सोमपालले त्यसअघि एमसिसीविरुद्धको सिरिजमा पनि सहभागिता जनाएका थिए।
सोमपालले अमेरिका र ओमानसँगको त्रिकोणात्मक सिरिज भने चोटका कारण गुमाएका थिए।
राष्ट्रिय टिमको वर्गीकरणमा स्पिनर ललितनारायण राजवंशी छैनन्। राजवंशी गत माघ अन्तिम साता भएको अमेरिका र ओमानसँगको त्रिकोणात्मक सिरिजमा नेपाली टिममा थिए।
यस्तै उनी १३औं सागमा पनि नेपाली टिममा थिए। बसन्त रेग्मीको अनुपस्थितिमा सन्दीप लामिछाने, सुसन भारी र ललित नेपाली टिमका मुख्य स्पिनर हुन्।
ललितले नेपालका लागि १२ टी–२० अन्तर्राष्ट्रिय खेल खेल्दा १० विकेट लिएका छन्। यस्तै उनले चार एकदिवसीय खेल खेल्दा लिस्ट 'ए'का १२ खेलमा सहभागीता जनाएका छन्।
यता पछिल्लो दुई वर्ष राष्ट्रिय टिमबाट लगातार खेलिरहेका अभिनास बोहोरा सी श्रेणीबाट माथि उक्लन सकेनन्।
महिला क्रिकेटरको वर्गीकरणमा पनि त्रुटी देखिएको छ। दुई वर्षदेखि राष्ट्रिय टिमबाट नखेलेकी ज्योती पाण्डे बी श्रेणीमा परेकी छिन्। यस्तै राष्ट्रिय टिमबाट बाहिरिसकेकी रितु कनौजिया पनि बी श्रेणीमा समावेश छिन्।
तर एक वर्षदेखि प्रभावशाली खेल देखाइरहेकी शान्ति (सुमन) खतिवडा वर्गीकरणमा समावेश छैनन्। उनी गत सागमा नेपाली टिममा समावेश थिइन्। यस्तै सागमा नेपाली टिममा रहेकी अर्की खेलाडी सरस्वती चौधरी पनि वर्गीकरणमा पर्न सकिनन्।
सागमा टिममा परेका खेलाडी वर्गीकरणमा नपर्दा टिममा नरहेका शोभा आले वर्गीकरणमा समावेश छिन्।
साग गेम्समा विश्वकीर्तिमान बनाएकी अञ्जली चन्द सी श्रेणीमा छिन्। लामो समयदेखि राष्ट्रिय टिममा रहेकी सोनु खड्का पनि सी श्रेणीमा छिन्।
राष्ट्रिय टिमबाट खेलेका खेलाडी नै वर्गीकरणमा छुटेको विषयमा पुनर्विचार गर्न सकिने क्यानका अध्यक्ष चतुरबहादुर चन्दले बताएका छन्।
क्यानले यसअघि कोषाध्यक्ष रोशन सिंहको संयोजकत्वमा खेलाडी वर्गीकरणका लागि समिति बनाएको थियो। सो समितिले बुझाएको प्रतिवेदनलाई मंगलबार अनुमोदन गरिएको हो।
पुरुष खेलाडी वर्गीकरण
(ग्रेड ए - मासिक ५० हजार, ग्रेड बी- मासिक ४० हजार, ग्रेड सी- मासिक ३० हजार)
ग्रेड ए- पारस खड्का, ज्ञानेन्द्र मल्ल, सन्दीप लामिछाने, शरद भेषवाकर, करण केसी, बसन्त रेग्मी,दिपेन्द्रसिंह ऐरी, विनोद भण्डारी
ग्रेड बी- सुसन भारी, सोमपाल कामी, आरिफ शेख, पवन सर्राफ
ग्रेड सी- सुवास खकुरेल, रोहित पौडेल, कुशल मल्ल, रासिद खान, अविनाश बोहोरा, कमलसिंह ऐरी
महिला खेलाडी वर्गीकरण
(ग्रेड ए- मासिक १५ हजार, ग्रेड बी- मासिक १२ हजार, ग्रेड सी- मासिक १० हजार)
ग्रेड ए- रुबिना क्षेत्री (बेलबासे), नेरी थापा, इन्दु बर्मा, सीता राना मगर, करुणा भण्डारी
ग्रेड बी- ज्योती पाण्डे, अप्सरी बेगम, रोमा थापा, विन्दू रावल, कविता जोशी, रितु कनौजिया, काजल श्रेष्ठ, सरिता मगर
ग्रेड सी- कविता कुँवर, डोली भट्ट, अनुराधा चौधरी, सोनु खड्का, अन्जली चन्द, शोभा आले
नेपाली महिला टिमले खेलेको पछिल्लो प्रतियोगिता सागको राष्ट्रिय टिम
रुविना क्षेत्री बेलवासे (कप्तान), सीता राना मगर, इन्दु बर्मा, काजल श्रेष्ठ, करुणा भण्डारी, अप्सरी बेगम, सरस्वती चौधरी, अञ्जली चन्द, सरिता मगर, शान्ति खतिवडा, रोमा थापा, डली भट्ट, कविता कुँवर
वैकल्पिक : ज्योती पाण्डे, संगीता राई, अस्मिना कर्माचार्य