इंग्ल्यान्डविरुद्धको पहिलो टेस्टमा वेस्ट इन्डिज विजयी भएको छ। आइतबार सकिएको टेस्टमा वेस्ट इन्डिजले घरेलु टिम इंग्ल्यान्डलाई ४ विकेटले पराजित गरेको हो।
पाँचौ दिन इंग्ल्यान्डले दिएको २ सय रनको लक्ष्य पछ्याएको वेस्ट इन्डिजले ६ विकेटको क्षतिमा लक्ष्य पार गर्यो। दोस्रो इनिङ्ग्समा वेस्ट इन्डिजका लागि जर्मेन ब्ल्याकउडले ९५ रनको योगदान दिए।
रोस्टन चेजले ३७ रन बटुल्दा सेन डोर्विचले २० रनको योगदान दिए।
बलिङमा इंग्ल्यान्डका जोफ्रा आर्चरले ३ विकेट र कप्तान वेन स्टोक्सले २ विकेट हात पारे।
त्यसअघि पहिलो इनिङ्ग्समा इंग्ल्यान्ड २ सय ४ रनमा अलआउट हुँदा वेस्ट इन्डिजले ३ सय १८ रन जोडेको थियो।
इंग्ल्यान्ड दोस्रो इनिङ्ग्समा ३ सय १३ रनमा अलआउट भएपछि वेस्ट इन्डिजले २ सय रनको लक्ष्य पाएको थियो।
पहिलो इनिङ्ग्समा ४ विकेट र दोस्रो इनिङ्ग्समा ५ विकेट गरी कुल ९ विकेट लिएका वेस्ट इन्डिजका सानन ग्राबियल प्लेयर अफ दि म्याच भए।