आगामी अक्टोबरमा अस्ट्रेलियामा हुने टी-२० विश्वकप प्रतियोगिता सार्ने कि तोकिएको समयमा गर्ने विषयमा दुई सातापछि निर्णय हुने भएको छ।
आइसिसीको बिहीबार बसेको टेलिकन्फरेन्स बोर्ड बैठकले आगामी जुन १० गते बस्ने बैठकमा आइसिसी टी-२० विश्वकप र अन्तर्राष्ट्रिय खेल तालिकाको विषयमा निर्णय गर्ने सहमति गरेको हो।
त्यसअघि क्रिकेट परिस्थितिको विषयमा अध्ययन गरिनेछ।
विश्वभर फैलिरहेको कोरोना भाइरसका कराण अन्तर्राष्ट्रिय क्रिकेट प्रभावित भएको अवस्थामा आगामी अक्टोबरमा हुने टी-२० विश्वकप पनि स्थगित गर्नु पर्ने बताइदै आइएको छ।
तर आइसिसीले टी-२० विश्वकप स्थगित गर्ने विषय साँचो नभएको बताइसकेको छ।
कोरोना कारण विश्वकै ठूलो फ्रेञ्चाइज क्रिकेट लिग आइपिएल अनिश्चितकालका लागि स्थगित छ। टी-२० विश्वकप भएको अवस्थामा आइपिएल हुने सम्भावना छैन। यदि टी२० विश्वकप नभए आइपिएल गर्नका लागि भारतीय क्रिकेट नियन्त्रण बोर्डले तयारी गरिरहेको छ।