भारतीय खेलकुद वृत्तमा 'डिप्रेसन' भएको कुरा लुकाइने विषयको रुपमा लिने गरिएको छ। तर पछिल्लो समय भारतीय क्रिकेट टिमका कप्तान विराट कोहलीले 'डिप्रेसन' को विषयमा बोलेको छन्। त्यो पनि अरुको नभइ आफू डिप्रेसन भएको विषयमा बोलेका हुन्।
विराटले आफू पाँच वर्षअघि डिप्रेसनमा पुगेको बताएका हुन्। त्यतिबेला 'अब सबै सक्किएको जस्तो' महसुस गर्ने गरेको उनको भनाइ छ।
बंगलादेशविरुद्ध टेस्ट खेल्नुअघि बुधबार कुरा गर्दै विराटले अस्ट्रेलियन अलराउन्डर ग्लेन म्याक्सवेलले मानसिक समस्याका कारण क्रिकेटबाट ब्रेक लिनु राम्रो भएको समेत बताए। म्याक्सवेलले दुई साताअघि शतक प्रहार गरेको भोलिपल्ट नै मानसिक समस्या भएकोले क्रिकेट नखेल्ने बताएका थिए।
म्याक्सवेललाई समर्थन गर्दै विराटले भनेका छन्,'मैले पनि त्यस्तै समय पार गरको थिएँ। मलाई त्यतिबेला सबै सक्किएको जस्तो लागेको थियो। के गर्ने, के भन्ने थाहा थिएन।
कसरी बोल्ने र कसरी संचार गर्ने आइडिया थिएन। तर मैले कसैलाई भनिन। मानसिक रुपमा बलियो थिइँन। मलाई खेलबाट बाहिर जानु थियो,' विराटले भनेका छन्, 'मलाई लाग्छ अन्तर्राष्ट्रिय खेल खेलिसकेका सबै क्रिकेटरले यस्ता कुरा सेयर गर्नु पर्छ, बोल्नु पर्छ।'
सन् २०१४ मा इंग्ल्यान्ड भ्रमणमा रहेका बेला कोहलीले १० इनिङमा केवल १३४ रन मात्र बनाएका थिए। त्यसपछि विराटको व्यापक आलोचना भएको थियो।
