आइतबार भएको खेलमा दक्षिण अफ्रिका पाकिस्तानसँग ४९ रनले पराजित भएको छ। पराजित भएसँगै उसको यस संस्करणको विश्वकप यात्रा समूह चरणमै सकिने निश्चित भएको छ।
हालसम्म खेलेका ७ खेलमा ५ खेलमा हार बेहोरेपछि उसको विश्वकप यात्रा लिग चरणमै सकिएको हो। उसको सेमिफाइनलमा प्रवेश गर्ने सम्पूर्ण समिकरणहरू सकिएको छ।
रंगभेद नीतिपछि सन् १९९१ मा दक्षिण अफ्रिका अन्तराष्ट्रिय क्रिकेटमा आएको थियो। सो समयदेखि यस टोलीले क्रिकेट प्रेमीबाट सद्भाव बटुल्दै आएको छ। उसले राम्रो प्रदर्शन पनि गर्दै आएको छ तर जबजब विश्वकपको चर्चा हुन्छ तबतब टोलीलाई भाग्यले ठग्ने गरेको छ। यसकारणले गर्दा उसलाई 'चोकर्स'को उपाधि समेत मिलेको छ। उसको २७ वर्षको विश्वकप इतिहास हेर्दा यस्तै देखिन्छ, जुन आफैमा रोचक छ
सन् १९९२
यो विश्वकपमा दक्षिण अफ्रिकाले पहिलोपटक सहभागिता जनायो। कुल ८ खेलमा ५ मा जित हासिल गर्दै अंक तालिकामा उसले तेश्रो स्थानमा आफूलाई उभ्यायो। सेमिफाइनलमा ऊ इङ्ल्याण्डलाई हराउने अवस्थामा थियो तर खेल वर्षाले बिथोल्यो। दोहोर्याएर खेल सुरू हुँदा उसलाई १ बलमा २१ रन बनाउने लक्ष्य मिल्यो जुन असम्भव थियो। नतिजा टोली विश्वकपबाट बाहिरियो, भाग्यले उसलाई ठग्यो।
सन् ११९६
यस विश्वकपमा समूह चरणका खेलमा ५ मा ५ म्याच जित्दै पहिलो स्थानमा रह्यो तर क्वार फाइनलमा वेस्ट इण्डिज उसको तगारो बन्यो। ब्रायन लाराले यस म्याचमा १११ रनको पारी खेलेका थिए।
सन् १९९९
यस विश्वकपमा पनि पाँचमा पाँचै खेल जित्दै माथिल्लो स्थानमा रह्यो। त्यसपछि भएको सुपर सिक्सको म्याचमा उसले पाँचमा ३ खेल जित्यो तर सेमिफाइनलमा अस्ट्रेलियासँग टाई भयो र प्रतियोगिताबाट बाहिरियो।
सन् २००३
उ जिम्बाबेसँग विश्वकपको संयूक्त आयोजक थियो। यसपटक उसको प्रदर्शन राम्रो भएन। कुल ६ खेलमा ३ मा जित, दुईमा हार तथा १ मा उसले बराबरी गर्यो। पहिलो पटक दक्षिण अफ्रिका विश्वकपको समूह चरणबाट अगाडि बढ्न सकेन। यो विश्वकपमा उसले डकवर्थ लुइसको नियमलाई राम्ररी बुझेको भए, उसले सुपर सिक्स खेल्न सक्थ्यो तर यसपटक पनि उहि कुराले धोका दियो- भाग्य र चोकर्स।
सन् २००७
दक्षिण अफ्रिकाले समूह चरणका ३ खेलमा दुईमा जित हासिल गर्यो। त्यसपछि भएको सुपर ८ मा ४ खेल जित्दै सेमिफाइनल पुग्यो। यसपटक पनि उसको तगारो अस्ट्रेलिया बन्यो। खेल हार्दै घर फर्कियो।
सन् २०११
यस विश्वकपमा उसले समूह चरणका ६ खेलमा ५ खेल जित्यो। समूह चरणमा उ पहिलो बन्यो। यस विश्वकपमा राम्रो फममा हुँदाहुँदै पनि क्वाटरफाइनलमा पराजित भयो। यसपटक उसलाई न्यूजिल्याण्डले हरायो।
सन् २०१५
समूह चरणको ६ खेलमा ५ खेलमा विजयी हुँदै दक्षिण अफ्रिका दोश्रो नम्बरमा रह्यो। क्वाटरफाइनलमा पनि श्रीलंकालाई उसले सजिलै हरायो। सेमिफाइनलमा उसको भेट फेरि एकपटक न्यूजिल्याण्डसँग भयो। न्यूजिल्याण्डलाई उसले ४३ ओभरमा २८२ रनको कठिन लक्ष्य दियो। लाग्थ्यो ऊ फाइनलमा पुग्नेछ तर त्यस्तो भएन। न्यूजिल्याण्डले सो लक्ष्य पूरा गर्यो। दक्षिण अफ्रिका फेरि एकपटक घर फर्किन बाध्य भयो।
सन् २०१९
यस विश्वकपमा उसले हालसम्म खेलेका ७ खेलमा ५ मा हार बेहोरेको छ। उसको प्रदर्शन यस विश्वकपमा बिर्सनलायक छ। उसले केवल अफगानिस्तानलाई हराएको छ। अब उसको दुई खेल बाँकी छ। दुबै खेलमा जित हासिल गरेपनि उसको विश्वकपमा अगाडि बढ्ने कुनै समिकरण बाँकी छैन। दुबै खेल जित्दा पनि उसले ७ अं जोड्न सक्छ जबकी अहिले शीर्ष चारमा रहेका टोलीहरूको अंक ८ या माथि रहेको छ।
यसरी यो विश्वकप उसका लागि सबैभन्दा लज्जास्पद रहेको छ। विश्वकपको यस प्रदर्शनमा उसलाई 'चोकर्स' भन्ने ठाँउ पनि छैन।
