भारतविरुद्धको पछिल्लो खेलमा सबै क्षेत्रमा कमजोर देखिएको पाकिस्तानका लागि प्रदर्शन सुधार गर्नुको विकल्प छैन।
अझ सेमिफाइनलमा स्थान पक्का गर्न त पाकिस्तानलाई बाँकी खेल जित्नु पर्ने बाध्यता छ। यस्तो दबाबमा रहेको पाकिस्तानले आइतबार दक्षिण अफ्रिकासँग खेल्दैछ।
हुन त दक्षिण अफ्रिकालाई पनि पाकिस्तानकै जस्तै दबाब छ। सेमिफाइनल सम्भावना लगभग सकिएको दक्षिण अफ्रिकाले पाकिस्तान भन्दा एक खेल बढी खेलेको छ।
बुधबार न्युजिल्यान्डविरुद्धको खेलमा झिनो अन्तरले पराजित भएसँगै दक्षिण अफ्रिकाको विश्वकप यात्रा कठिन अवस्थामा पुगेको थियो। अब बाँकी रहेका ३ खेलमा राम्रो खेल्दै आफ्नो छवि सुधार गर्ने दबाब दक्षिण अफ्रिकामाथि छ।
दक्षिण अफ्रिकाको बलियो पक्ष बलिङ हो। दक्षिण अफ्रिकाका बलरले विपक्षीमाथि लगातार दबाब दिइरहेका छन् तर ब्याट्सम्यान भने चल्न सकिरहेका छैनन्।
सुरुवाती २ खेलमा राम्रो खेलेको पाकिस्तानले पछिल्ला २ खेलमा भने अपेक्षाकृत प्रदर्शन गर्न सकेको छैन। अस्ट्रेलियासँग ४१ रनले पराजित हुँदा पाकिस्तानको ब्याटिङ फेल भएको थियो। भारतविरुद्ध ८९ रनले पराजित हुँदा त पाकिस्तान फिल्डिङ र बलिङमा पनि चुक्यो।
यद्यपी तीव्र गतिका बलर मोहमद अमिरले भने प्रभावशाली प्रदर्शन गरिरहेका छन्। तर उनलाई साथ दिन अन्य बलरले सकिरहेका छैनन्। पाकिस्तानको मध्यपंक्किको ब्याटिङ सफल हुन सकिरहेको छैन। लगातार असफल भइरहेका सोएब मलिकको स्थानमा हरिस सोहिललाई खेलाउदा पाकिस्तानको ब्याटिङले गति लिन सक्छ।
लन्डनको लर्ड्स मैदानमा आइतबार घाम लाग्ने पूर्वानुमान छ। पिच स्पिनरका लागि राम्रो मानिएको छ।
