जारी क्रिकेट विश्वकपमा अस्ट्रेलियाले बंगलादेशलाई ४८ रनले पराजित गरेको छ।
ट्रेन्ट ब्रिज रंगशालामा भएको खेलमा पहिले ब्याटिङ गर्दै अस्ट्रेलियाले ३८२ रनको लक्ष्य दिएको थियो।
जवाफी ब्याटिङ गर्न आएको बंगलादेशले निर्धारित ५० ओभरमा ८ विकेट गुमाउँदै ३३३ रनमा समेटिएपछि खेल ४८ रनले गुमाएको हो।
बंगलादेशको यो योगफल हालसम्म उसले एकदिवसीय खेलमा बनाएको सर्वाधिक ठूलो योगफल हो। यस पारीमा बंगलादेशका लागि मुस्फिकर रहमानले नटआउट १०२ रन बनाए भने महदुल्लाहले ६९, तामिम एकवालले ६२ तथा शाकिब अल हसनले ४१ रन जोडेका थिए।
यसक्रममा अस्ट्रेलियाका लागि मिचेल स्टार्क, नाथन कलटर तथा मार्कोस स्टोइनीसले समान २-२ विकेट लिदा एडम जाम्पाले १ विकेट लिए।
त्यसअघि टस जितेर ब्याटिङ गरेको अस्ट्रेलियाले निर्धारित ५० ओभरको खेलमा ५ विकेटको क्षतिमा ३८१ रन जोडेको थियो।
अस्ट्रेलियाका लागि ओपनर डेभिड वार्नरले शतक प्रहार गरे। उनले १६६ रनको योगदान दिए। १४७ बल खेलेका वार्नरले १४ चौका र ५ छक्का प्रहार गरे। कप्तान आरोन फिन्च ५३ रनमा आउट हुँदा उस्मान खावाजाले ८९ रन बनाए। खावाजाले ७२ बलमा १० चौका हिर्काए।
ग्लेन म्याक्सवेल ३२ रनमा रनआउट भए। उनले १० बलमा २ चौका र ३ छक्का प्रहार गरे। स्टिभ स्मिथ १ रनमा आउट हुँदा मार्कोस स्टोइनिसले नटआउट १७ र एलेक्स कारीले नटआउट ११ रन जोडे।
बलिङमा बंगलादेशका सौम्य सरकारले ३ विकेट लिए भने मुस्ताफिजुर रहमानले १ विकेट हात पारे।
जितसँगै अस्ट्रेलिया ६ खेलमा ५ जित र १ हार सहित १० अंक सहित अंकतालिकाको शीर्ष स्थानमा उक्लेको छ भने हार पछि बंगलादेश ६ खेलमा २ जित र ३ हारको साथ ५ अंक सहित पाँचौ स्थानमा रहेको छ।
