प्रधानमन्त्री कप महिला क्रिकेटका प्रदेश ३ की खुसी डंगोलले कीर्तिमानी बलिङ गरेकी छिन्। खुसीले बिहीबार कञ्चनपुरमा भएको खेलमा कर्णाली प्रदेशविरुद्ध १.३ ओभर बलिङ गर्दा ५ विकेट लिएकी हुन्। तर उनले रन खर्चिइनन्।
खुसीले कर्णालीकी रविना लक्ष्मी रिमाललाई ११ रनमा एलबिडब्लू आउट गर्दा कमला घर्तीमगरलाई बोल्ड, लक्ष्मी पुरीलाई क्याच, हिरा विकलाई बोल्ड र सरिता जिसीलाई बोल्ड गरिन्। पछिल्ला चार खेलाडीले रन जोड्न सकेनन्।
पाँच विकेट लिएकी खुसीले ह्याट्रिक गर्न भने सकिनन्। उनले १३.३, १३.५, १३.६, १५.२ र १५.३ ओभरमा विकेट लिएकी थिइन्।
खुसीको घातक बलिङसँगै १५७ रनको लक्ष्य पछ्याएको कर्णाली ६६ रनमा अलआउट भयो। जससँगै प्रदेश ३ ले ९० रनको जित हात पार्यो। कार्णालीका लागि रविना चौधरीले सबैभन्दा बढी २२ रनको योगदान दिइन्।
त्यसअघि टस जितेर पहिले ब्याटिङ गरेको प्रदेश ३ ले २० ओभरमा ३ विकेटको क्षतिमा १५६ रन जोड्यो। प्रदेश ३ का लागि ओपनरद्वय अस्मिता खरेल र कञ्चन श्रेष्ठले २८–२८ रन जोडे। अस्मिना कर्माचार्याले नटआउट ४७ रन र सुमन खतिवडाले २१ रन बटुले। बलिङमा कर्णालीकी सरिता जिसीले १ विकेट लिइन्।
