आइसिसी क्रिकेट विश्वकप २०१९ मा बंगलादेशले उत्कृष्ट प्रदर्शन गरिरहेको छ। पछिल्लो खेलमा वेस्ट इन्डिजमाथि जित निकालेको बंगलादेशले बिहीबार पाँच पटकको विजेता अस्ट्रेलियासँग भिड्दैछ। ट्रेन्ट ब्रिजमा सवा ३ बजे सुरु हुने खेलमा बंगलादेशका लागि अस्ट्रेलिया प्रतियोगिताको बलियो प्रतिद्वन्द्वी हो।
अस्ट्रेलियाले विश्वकपमा आफ्नो सतप्रतिशत खेल देखाइरहेको छ। अलराउन्डर मार्कोस स्टोइनिस घाइते हुँदा अस्ट्रेलियालाई मध्यक्रममा समस्या हुन सक्छ। अस्ट्रेलियाका सहायक प्रशिक्षक ब्राड हेडिन भने टिमले अझै राम्रो खेल्न सकेको बताउछन्।
अस्ट्रेलियाका भरपर्दा ब्याट्सम्यान र बलरले उत्कृष्ट खेलिरहेका छन्। बलिङमा मिचेल स्टार्क र पाट कमिङ्ग्सको जोडी जमेको छ। कप्तान आरोन फिञ्च र डेभिड वार्नरले राम्रो ओपनिङ गरिरहेका छन्। स्टिभ स्मिथले मिडल अर्डर सम्हालिरहेका छन्। यस्तो अवस्थामा अस्ट्रेलियाका लागि सेमिफाइनल सहज देखिएको छ।
बंगलादेशले पाँच खेल मध्ये २ मा जित र २ मा हार बेहोरेको छ। एक खेल वर्षाले रद्द भएको थियो। वेस्ट इन्डिजविरुद्ध पछिल्लो खेलमा ३२२ रनको लक्ष्य पूरा गरेकाले बंगलादेशको आत्मविश्वास बढेको छ। यस्तै प्रदर्शन दोहोर्याएको अवस्थामा बंगलादेशले अस्ट्रेलियालाई पनि गाह्रो पार्न सक्छ। पाँच पटकको विजेता अस्ट्रेलियाविरुद्ध भिड्दा बंगलादेशको सुरुवाती ब्याट्सम्यानले सुझबुझ तरिकाले खेल्नु जरुरी छ।
ट्रेन्ट ब्रिजमा दिउँसो वर्षा हुने सम्भावना न्यून रहेको पूर्वानुमान गरिएको छ। यहाँको पीच तीव्र गतिका बलरका लागि राम्रो मानिएको छ।
