भारतीय क्रिकेट टिमका ओपनर शिखर धवनले इंग्ल्याण्डमा जारी एक दिवसीय विश्वकपका बाँकी खेल गुमाउने भएका छन्। बिसिसिआईले धवनको ठाउँमा विकेट किपर ब्याट्सम्यान ऋषभ पन्तलाई खेलाउने भएको छ।
धवनले आइतबार अस्ट्रेलियाविरूद्ध भएको खेलमा सानदार ११७ रन बनाएका थिए। अष्ट्रेलियन बलर नाथन कुल्टर नाइलको बलमा धवन घाइते बनेका थिए।
यस पारीका लागि उनलाई म्यान अफ द म्याच घोषित गरिएका उनी चोटका कारण फिल्डिङका लागि मैदानमा आएका थिएनन। उनको सट्टा रवीन्द्र जडेजाले फिल्डिङ गरेका थिए।
औंलामा चोट लागेपछि उनी ३ साताका लागि मैदान बाहिर बस्नुपर्ने बताइएको थियो तर उनी पूर्ण रूपमा निको हुन नसकेपछि बाँकी खेल गुमाउने भएका हुन्।
धवन टिमका महत्वपूर्ण सदस्य भएकाले नकआउट चरणमा खेल्न सक्छन् कि भनेर बिसिसिआईले उनलाई फिर्ता बोलाएको थिएन। तर उनले पूरै प्रतियोगिता खेल्न नसक्ने भएमा उनको ठाउँमा जाने खेलाडीलाई तयारी गर्ने समय नहोला भनेर पन्तलाई पहिले नै इंग्ल्याण्ड पठाएको थियो।
धवन प्रतियोगिताबाट बाहिर भइसकेपछि इंग्ल्याण्डमै रहेका पन्तले आगामी शनिबार अफगानिस्तानविरूद्ध हुने खेलमा खेल्न सक्छन्।
