आइसिसी क्रिकेट विश्वकप २०१९ अन्तर्गत अघिल्लो खेलमा अफगानिस्तानलाई हराएको दक्षिण अफ्रिकाको सेमिफाइनलमा पुग्ने सम्भावना कायमै छ।
५ खेलबाट ३ अंक जोडेको दक्षिण अफ्रिकाले सेमिफाइनलमा पुग्ने सम्भावना जीवित राख्न बुधबार दिउँसो बमिङघममा हुने न्युजिल्यान्डविरुद्धको खेल जित्नुपर्छ। तर जारी प्रतियोगितामा अपराजित टिम न्युजिल्यान्ड दक्षिण अफ्रिकाका लागि सहज लक्ष्य हुनेछैन।
४ खेलबाट ७ अंक जोडेर अंक तालिकाको तेस्रो स्थानमा रहेको न्युजिल्यान्डको नजर समूह चरणका केहि खेलअघि नै सेमिफाइनल पुग्नेमा छ।
अघिल्लो संस्करणको फाइनलमा पुगेर पनि उपाधि जित्न नसकेको न्युजिल्यान्ड यसपटक फर्ममा देखिएको छ। त्यसैले बुधबार खराब खेलिरहेको दक्षिण अफ्रिकालाई पराजित गरेर अपराजित यात्रा कायम राख्ने लक्ष्यमा न्युजिल्यान्ड हुनेछ।
न्युजिल्यान्डले समूह चरणका तीन खेलमा जित हात पारिसकेको छ। भारतविरुद्धको खेल भने वर्षाले रद्द भयो। न्युजिल्यान्डको बलियो पक्ष बलिङ देखिएको छ। यद्यपी मिडल अर्डर ब्याटिङ न्युजिल्यान्डको समस्या हो। दक्षिण अफ्रिकाविरुद्ध मिडल अर्डरमा सुधार गर्ने उद्देश्यमा न्युजिल्यान्ड हुनेछ।
लगातार पराजित भएको पिडा दक्षिण अफ्रिकाले अफगानिस्तानलाई ९ विकेटले हराएर भुलाएको थियो। इमरान ताहिरले खेलमा ४ विकेट लिएका थिए। ताहिर न्युजिल्यान्डविरुद्ध पनि खतरा बन्न सक्छन्। यता अर्का बलर लुङ्गी एनगिडी पनि फिट भएका छन्। उनको आगमनले टिममा सकारात्मक प्रभाव पर्नेछ।
बर्मिङघममा बुधबार विहान बादल लाग्ने तथा हल्का वर्षा हुने पूर्वानुमान गरिएको छ। तर दिउँसो भने मौसम सफा रहेछ। यो मैदानमा पछिल्ला ४ मध्ये ३ खेलमा पहिले ब्याटिङ गर्ने टिमले जितेको छ।
