जारी विश्वकप क्रिकेटमा आइतबार अस्ट्रेलिया र भारत एकआपसमा भिड्दैछन्। पछिल्लो २०-२५ वर्षमा भारत र अस्ट्रेलियाबीच रोमाञ्चक प्रतिष्पर्धा हुनेगरेको छ। पछिल्लो ५ एक दिवसीय क्रिकेट श्रृखंला अस्ट्रेलियाले ३-२ ले आफ्नो पक्षमा पार्यो। यसपटकको अस्ट्रेलियाको खेल हेर्दा विश्वकपमा ऊ आफ्नो उपाधि रक्षा गर्ने लक्ष्यमा दृढ देखिएको छ।
१० टोली समाविष्ट रहेको यस विश्वकपमा भारतका लागि अस्ट्रेलिया सबैभन्दा खतरा अस्ट्रेलियाबाट नै छ। सन् २००३ मा भारतलाई विश्वकप जित्ने मौका मिलेको थियो तर त्यतिबेला अस्ट्रेलियाको अगाडि उसको कुनै जोर लागेन।
दक्षिण अफ्रिकामा भएको यस विश्वकपमा भारत अस्ट्रेलियाबाहेक अर्को कुनै टोलीसँग पराजित भएन। अस्ट्रेलियासँगको हारले नै उ विश्वकप जित्नबाट विमुख भयो
सन् २००३को विश्वकपमा भारत आफ्नै गल्तीले पराजित भएको थियो। सो विश्वकपमा उनीहरू एकआपसमा दुईपटक भिडे जसमा दुबैपटक नतिजा अस्ट्रेलियाको पक्षमा गयो।
सो विश्वकपमा दुबैबीचको खेल यस्तो थियोः
१५ फेब्रुवरी, २००३: भारत सौरभ गांगुलीको कप्तानीमा विश्वकपमा आएको थियो। सो खेलमा भारतले टस जित्यो र पहिले ब्याटिङ गर्ने फैसला गर्यो। गांगुलीले पिचको अवस्था खुट्क्याउन चुके। यस पिचमा धेरै घाँस थियो र हावा पनि चलिरहेको थियो। यस परिस्थितिमा भारतले पहिले ब्याटिङ गर्ने निर्णय गर्यो। भारतको ब्याटिङ क्रमलाई अस्ट्रेलियाका फास्ट बलर ग्लैन मैक्गरा, ब्रेट ली तथा जेसन गिलेस्पीले धवस्त पारिदिए। भारतीय टोली १२५ रनको न्यून स्कोरमा आउट भयो। सो म्याचमा अस्ट्रेलियाले ९ विकेटले कब्जा जमायो।
२३ मार्च २००३: पहिलो भेटमा ९ विकेटले पराजित भएको भारतको भेट अस्ट्रेलियासँग फेरि फाइनलमा भयो। यसपटक पनि टस भारतले नै जित्यो। सौरभले पहिलो म्याचको गल्ती फेरि दोहर्याए। उनले यसपटक फिल्डिङ गर्ने निर्णय गरे। यसपटक पनि उनको पिच अध्ययनले हावा खायो। प्रतियोगिता अवधिभर प्रभावशाली रहेका जहीर खान, जवागल श्रीनाथ, आशिष नेहरा जस्ता फास्ट बलरहरू यस म्याचमा फ्लप बने। उनीहरू बलिङ गर्दा यति हडबडाएकी १९ वाइड बल र नो बल हाने।
अस्ट्रेलियाका चार ब्याटस्म्यान भारतका बलरहरूलाई आच्छु आच्छु पार्न पर्याप्त भए। एडम गिलक्रिस्टले ५७ रन, म्याथ्यू हेडनले २७, रिक्की पोन्टिङले अविजित १४० तथा ड्यानियल मार्टिनले अविजित ८८ रन बनाउँदै भारतलाई जितका लागि ३६० रनको विशाल स्कोर खडा गरिदिए। जवाफी ब्याटिङमा आएको भारत २३४ रन बनाउँदा अलआउट भयो।
विश्वकप क्रिकेटमा यो यस्तो दुई हारमा पर्छ जुन भारतीय प्रशंसकका लागि कुनै झट्काभन्दा कम थिएन। प्रतियोगिता अवधिभर कुनै टोलीसँग नहारेको भारत अस्ट्रेलियाका सामु दुबै अवसरमा नीरिह बन्यो। विश्वकपमा अस्ट्रेलिया सदैव भारतका लागि एउटा खतराका रूपमा रहँदै आएको छ।
यसपटक पनि अस्ट्रेलिया उत्कृष्ट लयमा छ। वेस्ट इण्डिजविरूद्धको खेलमा एकसमय लरबराएपनि उसले अन्तिममा म्याच आफ्नो पक्षमा पार्यो। खेलमा उसको पुनरागमन गज्जबको थियो।
यस्तोमा अस्ट्रेलियालाई इतिहास र वर्तमानका कारण पनि आजको म्याचमा भारतले कम आँक्ने गल्ती कदापी गर्नेछैन।