इण्डियन प्रिमियर लिग (आइपिएल) क्रिकेट खेलेर नेपाली राष्ट्रिय टोलीका लेग स्पिनर सन्दीप लामिछाने स्वदेश फर्किएका छन्।
आइतबार अपरान्ह ४ :३० बजे स्वदेश फर्किएका उनले पत्रकार सम्मेलनमा यो पटक आफूले धेरै कुरा सिक्न पाएको अनुभूति साटे।
‘पहिलाको भन्दा धेरै कुरा सिक्ने अवसर पाएँ’,उनले भने,‘६ खेलबाट मैले धेरै उपलब्धि हासिल गरें।’
तपाईंलाई बेञ्चमा बस्दा कस्तो लाग्यो?भन्ने प्रश्नमा उनले भने,‘मलाई त्यस्तो केही लागेको छैन। मलगायत अरू राम्रा खेलाडीहरू पनि बेञ्चमै बस्नु भएको थियो। कति राम्रो खेलाडीले एक पटक मात्र खेलेर चित्त बुझाउनु पर्यो। मैले त ६ खेल खेल्ने मौका पाएँ। रिजल्टप्रति खुसी नै छु।’
उनले धेरै समय बाहिर नै बिताएर परिवारलाई समय दिन नसकेकोमा दु:ख व्यक्त गर्दै आगामी जेठमा हुने प्रधानमन्त्री कप नखेली केही समय परिवारलाई दिने बताए।
‘घरमा समय दिन नपाएकोले दु:खी छु। त्यसैले अबको केही समय परिवारलाई दिन्छु’, उनले भने’, जेठदेखि सुरू हुन लागेको प्रधानमन्त्री कपमा म सहभागी हुने छैन।’
आइपिएलमा सन्दीपले दिल्ली क्यापिटल्सबाट खेलेका थिए। तर, उनको टिम दिल्ली दोस्रो क्वालिफायरमा चेन्नइ सुपर किङसँग पराजित भयो। दिल्ली फाइनल पुग्न असफल भएपछि सन्दीप स्वदेश फर्किएका हुन् ।
यस सिजनमा सन्दीपले ६ खेल खेल्दै ८ विकेट लिएका थिए ।