मुम्बई इण्डियन्स जारी आईपिएलको प्लेअफमा पुग्ने तेश्रो टोली बनेको छ। बिहिबार भएको खेलमा सनराइजर्स हैदराबादलाई सुपर ओभरमा पराजित गर्दै मुम्बई प्लेअफमा पुगेको हो।
मुम्बईले यस म्याचमा पहिलो ब्याटिङ गर्दै पाँच विकेटको क्षतिमा १६२ रन बनाएको थियो भने जवाफी ब्याटिङमा हैदराबादले पनि ६ विकेटको क्षतिमा यतिनै रन बनायो। त्यसपछि खेल सुपर ओभरमा पुग्यो। सुपरओभरमा हैदराबादले मनीष पाण्डे र मोहम्मद नबीको विकेटमा ८ रन बनायो, त्यसको जवाफमा ब्याटिङ गरेको मुम्बईले मात्र ३ बलमा ९ रन जोड्यो र हैदराबादलाई पराजित गर्यो। अनि जितसँगै मुम्बईका लागि प्लेअफको बाटो खुल्यो। यस क्रममा हार्दिक पांड्या ७ तथा किरोन पोलार्ड २ रनमा अविजित रहे।
जीतसँगै १६ अंक जोडेको मुम्बई लिगको दोश्रो स्थानमा पुगेको छ। हैदरबादको भने १२ अंक रहेको छ। १८ अंक सहित हैदराबाद पहिलो स्थानमा रहेको छ भने १६ अंकसहित दिल्ली तेश्रो स्थानमा रहेको छ। यी तीनै टोलीले अब १-१ म्याच खेल्न बाँकी छ।
दुबै टोली लिगको पहिलो स्थानको दौडमा रहेका छन्। अन्तिम म्याचमा चेन्नई हारेमा मुम्बई र दिल्लीले जितेमा तीनै टोलीको समान अंक हुनेछ। यस्तोमा शीर्ष टोलीको निर्धारण रनरेटका आधारमा हुनेछ। यदि चेन्नईले जितेमा मुम्बई र दिल्लीको प्रतिष्पर्धा दोश्रो स्थानका लागि हुनेछ।
मुम्बई र हैदराबाद बीचको खेलमा मुम्बईले टस जितेर पहिलो ब्याटिङ गर्ने निर्णय गरेको थियो। उसले निर्धारित २० ओभरमा पाँच विकेटको नोक्सानीमा १६२ रन बनायो। उसका लागि क्विंटन डि ककले सर्वाधिक ६९ रन जोडे।
यस्तै रोहित शर्मा र सूर्यकुमार यादवले २४ र २३ रन जोड्दा हार्दिक पांड्याले १८ रन जोडे भने कीरोन पोलार्डले १० रन जोडे। यस्तै क्रुणाल; पांड्याले ९ रन बनाए। हैदराबादका लागि खलील अहमदले ३ विकेट लिदां भूवनेश्वर कुमार र मोहम्मद नबीले १-१ विकेट लिए।
त्यसपछि लक्ष्य पछ्याउन आएको हैदराबादले एक समय १०५ रनमा आफ्ना पाँच विकेट गुमाएको थियो तर मनिष पाण्डेले ४७ बलमा ७१ रनको पारी गर्दै खेललाई बराबरीमा पुर्याए।
जितका लागि अन्तिम बलमा सात रन आवश्यक रहेको हैदरबादका लागि मनिषले सो बलमा छक्का प्रहार गरेपछि खेल बराबरीमा पुगेको थियो। उनले मोहम्मद नबीसँग मिलेर ३१ बलमा ४९ रनको साझेदारी गरे।
मुम्बईका लागि जसप्रीत बुमराह, हार्दिक पांड्या र क्रुणाल पांड्याले समान २-२ विकेट लिए।
मुम्बईले लिगको अन्तिम खेल कोलकाता नाइटराइडर्ससँग आइतबार खेल्नेछ। यस्तै हैदराबादले आफ्नो अन्तिम खेल विराट कोहलीको रोयल चयालेन्जर्स, बेङ्लोरसँग खेल्नेछ।
