सोमबार भएको ईण्डियन प्रिमियर लिगको खेलमा दिल्ली क्यापिटल्सले राजस्थान रोयल्सलाई ६ विकेटले पराजित गरेको छ।
जितसँगै दिल्ली लिगको शीर्ष स्थानमा पुगेको छ।
पहिले बलिङ रोजेको दिल्लीलाई राजस्थानले १९२ रनको लक्ष्य दिएको थियो। सो लक्ष्यलाई दिल्लीले चार बल बाँकी छँदा चार विकेटको नोक्सानीमा हासिल गर्यो।
दिल्लीलाई जित दिलाउने क्रममा ऋषभ पन्तले नटआउट ७८ रन जोडे। उनले ३६ बलमा ४ छक्का तथा ६ चौका प्रहार गरेका थिए। यस्तै शिखर धवन र पृथ्वी शाले क्रमशः ५४ र ४२ रनको योगदान दिए। पृथ्वीले पहिलो विकेटका लागि धवनसँग ७२ रन तथा पन्तसँग तेश्रो विकेटका लागि ८४ रनको साझेदारी गरे।
राजस्थानका लागि श्रेयस गोपाल २,धवन कुलकर्णी र रियान परागले १-१ विकेट लिए ।
पछिल्ला ६ खेलमा दिल्लीको यो पाँचौ जित हो। उसले ११ म्याचबाट १४ अंक जोडेको छ।
त्यस्तै चेन्नईको समान १४ अंक रहेको भएपनि दिल्लीले रनरेटमा उसलाई दोश्रो स्थानमा धकेलेको हो। राजस्थानले भने १० म्याचबाट ६ अंक जोडेको छ। यसले उसको प्लेअफ यात्रालाई केहि कठिन बनाएको छ।
हिजोको खेलमा पहिले ब्याटिङ गरेको राजस्थानका लागि अजिंक्य रहाणेले करियरको सर्वश्रेष्ठ पारी खेल्दै ६३ बलमा ११ चौका तथा ३ छक्काको सहयोगमा नटआउट १०५ रनको पारी खेले।
उनका अलावा कप्तान स्टीव स्मिथले ५० रनको योगदान दिए। यस्तै राजस्थानका लागि बेन स्ट्रोक्स ८ र एस्टन टर्नर शून्यमा आउट हुँदा स्टुअर्ट बिन्नीले १९ रन बनाएका थिए ।
दिल्लीका कागिसो रबडाले २, ईशान्त शर्मा,क्रिस मोरिस र अक्षर पटेलले १-१ विकेट लिएका थिए।
हिजोको खेलमा अघिल्लो खेलमा ३ विकेट लिएका नेपालका सन्दिप लामिछाने अन्तिम ११ मा अटाएनन्। दिल्लीले उनको सट्टा मैदानमा क्रिस मोरिसलाई मौका दिएको थियो।
