आइतबार राति भएको दिल्ली क्यापिटल्स र सनराइजर्स हैदराबादबिचको आईपिएल टि-२० लिगमा दिल्लीले अन्तिम समयमा हैदरबादबाट नतिजा खोसेको छ।
दिल्लीसँग हैदराबाद ३९ रनले पराजित भएको छ।
दिल्लीले हिजोको खेल रोमाञ्चक र नाटकीय ढंगले आफ्नो पक्षमा पार्यो।
हिजोको खेलमा पहिले ब्याटिङ् गरेको दिल्लीले हैदराबादलाई १५६ रनको लक्ष्य दिएको थियो। सो लक्ष्य पछ्याउने क्रममा हैदरबाद एक समय मात्र २ विकेटको नोक्सानीमा १०१ रनको बलियो अवस्थामा थियो तर मात्र १५ रनको खर्चमा दिल्लीले उसका ८ विकेट झारेपछि जित दिल्लीको हातमा पुग्यो। उनीहरूले हैदरबादलाई १८.५ ओभरमा सबै विकेट झार्दै ११६ रनमै सिमित गरेपछि यो जित सम्भव भयो।
दिल्लीलाई यो अभूतपूर्व जित दिलाउने क्रममा कैगिसो रबाडाले २२ रन दिदैं ४ विकेट लिए भने समान रन दिदैं क्रिस मरिसले ३ विकेट लिए भने किमो पलले पनि ३ विकेट आफ्नो नाममा बनाए।
जारी सिजनमा दिल्लीको यो पाँचौ जित हो। जितसँगै ऊ अंक तालिकाको दोश्रो स्थानमा पुगेको छ। पहिलो नम्बरमा चेन्नई रहेको छ। उसको १४ अंक छ।
आइतबारको खेलमा टस जितेर फिल्डिङ रोजेको हैदराबादले राम्रो सुरूवात गरेको थियो। उसले शिखर धवन तथा पृथ्वी शाँलाई सस्तैमा पेभेलियन फर्काए। यसक्रममा धवनले ७ र शाँले केवल ४ रनमात्र जोड्न सके। दुबैको विकेट खलील अहमदले लिए।
यस्तै दिल्लीका लागि कालिन मुनरो र कप्तान श्रेयस अञ्यरले ४० र ४५ रन जोड्दा टोलीका लागि ऋषभ पंतले २३ तथा अक्षर पटेलले १४ रन जोडेर टोलीको रनस्कोर ७ विकेटको नोक्सानीमा १५५ बनाए।
हैदरबादका लागि खलीलले ३, भूवनेश्वरले २ तथा अभिषेक शर्मा र राशिद खानले १-१ विकेट लिए।
त्यसपछि १५६ रनको लक्ष्य पछ्याउन आएको हैदरबादले गतिलो सुरूवात गर्यो। आईपिएल-१२ का सबैभन्दा खतरनाक ओपनिङ जोडी डेविड वार्नर र जोनी बेयरस्टोले क्रमशः ५१ र ४१ रन बनाउँदै ७२ रनको साझेदारी गरे। यस साझेदारीपछि हैदरबादले बेयरस्टोलाई गुमायो।
हैदराबद एकसमय १५ ओभर र २ विकेटको नोकशानीमा १०० रनमा थियो। यससमय खेल उसले जित्ने देखिएको थियो। वार्नर र रिकी भुई क्रिजमा रहेको अवस्था थियो। जितका लागि उसलाई ५६ रन बनाउनुपर्ने थियो र ८ विकेट बाँकी थियो। तर मात्र ६ रन जोड्दा उसले ३ विकेट गुमायो। वार्नर र विजय शंकर टोलीको १०६ रनस्कोरमा आउट भए। त्यसपछिका ब्याटसम्यानलाई दिल्लीका बलरहरूले १० मात्र जोड्न दिए र टोली ११६ रनमै अलआउट भयो।