नेपाली युवा क्रिकेटर सन्दीप लामिछानेले आज इन्डियन प्रिमियर लिग (आईपीएल) मा पहिलो खेलमै प्लेइङ एघारमा गर्ने सम्भावना रहेको छ।
गत वर्ष दिल्ली डेयरडेभिल्स (हालको दिल्ली क्यापिटल) मा आवद्ध सन्दीपलाई क्लबले रिटेन गरेपछि लगातार दोस्रो आइपिएल खेल्न लागेका उनी आज हुने पहिलो खेलमै प्लेइङ सेटमा गर्ने सम्भावना उच्च रहेको छ।
आईपीएलमा दोस्रो सहभागीता बिच सन्दीपले अधिकांश अन्तर्राष्ट्रिय क्रिकेट लिग खेलिसकेका छन्। करिब एक वर्षमा उनले ६ वटा देशमा टी-२० लिग र एउटा टी-१० लिगमा राम्रै छाप छोडेका छन्। यद्यपी कुनै पनि प्रतियोगितामा उनले पुरै खेल्न भने पाएनन्।
गत वर्ष आईपीएलमा भाग लिँदा अन्तर्राष्ट्रिय क्रिकेट प्रेमीका लागि अपरिचित अनुहार एक वर्षको अन्तरमै एकाएक चर्चाको शिखरमा पुगेका छन्। एउटा एसोसिएट क्रिकेट राष्ट्रबाट उदाएको १८ वर्षे ठिटोका लागि यो भन्दा अरू सफलता के होला र?
अघिल्लो संस्करणमा टिमको प्लेइङ सेटमा पर्न १० औं खेलसम्म कुर्नुपरेको सन्दीपका लागि यो संस्करणमा पहिलो खेलमै मौका पाउने सम्भावना बढेको छ।
पूर्व अष्ट्रेलियन क्रिकेटर तथा वर्तमान क्रिकेट विश्लेषक ब्र्याड हजले सन्दिप लामिछानेलाई दिल्ली क्यापिटल्सको एक्स-फ्याक्टर खेलाडीको रूपमा औल्याएका छन्।
क्रिकेट साइट, इएसपिएन क्रिकिन्फोसँगको कुरा गर्दै हजले सन्दीपको तारिफ गर्दै यो सिजन दिल्लीका लागि सन्दीपले राम्रो नतिजा निकाल्न महत्वपूर्ण योगदान दिनसक्ने समेत बताए।
क्रिक इन्फोले सन्दीपलाई आइतबार हुने मुम्बई इन्डिएन्स बिरूद्धको खेलमा दिल्ली क्यापिटल्सको सुरुवाती-११ मा समेत राखेको छ।
अन्तिम सिजनमा खेलेका ३ खेल र भर्खरै सम्पन्न बिग ब्यास लिगमा गरेको सन्दीपको प्रदर्शनको तारिफ गर्दै हजले उनलाई क्षमतावान खेलाकी रूपमा औल्याएका छन्। ‘मैले दिल्लीको एक्स-फ्याक्टर खेलाडीको रुपमा सन्दीप लामिछानेलाई लिएको छु,’ उनले भने,‘ एक स्पिनरका रुपमा सन्दिपसँग टर्न् र बाउन्स राम्रो रहेको छ। उनको गुगलीसमेत सटिक छ। मैले उनलाई अष्ट्रेलियामा बिग ब्यासका दौरान बलिङ गरेको हेर्ने मौका पाएको थिए।’
उनले सनराइजर्स हैदरावादमा राशिद खानले जस्तै भूमिका दिल्लीमा सन्दिपले निभाउने बताएका छन्।
सन्दीपको टी-२० करियरमा कोशेढुंगा साबित भएको आइपिएलको अघिल्लो सिजन यता सन्दिपले विश्वभरका टि-२० लिगको स्वाद चाखिसकेका छन्।
पछिल्लो वर्षको आइपिएल पछि सञ्चालन भएका टी-२० लिगहरुमा दक्षिण अफ्रिकाको घरेलु टी-२० लिग र भाइटालिटि टि-२० ब्लास्ट ( इंग्ल्याण्ड ) बाहेक अन्य सबै प्रतियोगितामा सन्दीप सहभागी हुँदै आएका छन्। साथै उक्त लिगमा सन्दिपको प्रदर्शनसमेत सन्तोषजनक रहँदै आएको छ।
सन्दीपको प्रदर्शन
- क्यारेबियन प्रिमियर लिग- ७ विकेट (५ खेल)
- ग्लोबल टी-२० लिग- ८ विकेट (५ खेल)
- अफगानिस्तान प्रिमियर लिगमा २ विकेट (१ खेल)
- बिग ब्यास लिग- ११ विकेट (८ खेल)
- बंगलादेश सुपर लिग- ४ विकेट (६ खेल)
- पाकिस्तान सुपर लिग- ११ विकेट (७ खेल)
- टी-१० लिग- ६ विकेट (६ खेल)
३६ टी-२० खेलको अनुभव बटुलिसकेका सन्दिपले ६.८० को इकोनोमीमा ४५ विकेट हात पारिसकेका छन्।
आफू सहभागी हरेक लिगहरुको सर्वाधिक विकेट लिने खेलाडीको सूचीमा सन्दिप अटाउँदै आएका छन्।
यी अनुभवको आधारमा यो सिजन दिल्लीले सन्दिपलाई धेरै खेलमा मौका दिने अपेक्षा गरिएको छ।
यद्यपी टोलीमा अमित मिश्रा, राहुल तेवाटिया र अक्षर पटेल जस्ता अनुभवी भारतीय स्पिनर रहेकाले सन्दिपले अन्तिम ११ मा स्थान बनाउन सजिलो भने छैन।