युएईमा जारी पाकिस्तान सुपर लिगमा सन्दीप लामिछानेले डेब्यू खेलमै ३ विकेट लिएका छन्।
नेपाली युवा बलर सन्दीप लामिछानेले पाकिस्तान सुपर लिग क्रिकेट प्रतियोगिता अन्तर्गत आफ्नो पहिलो खेलमा मुल्तान सुल्तानविरूद्ध ३ विकेट लिँदै उत्कृष्ट डेब्यू गरेका हुन्। तीन विकेट लिने क्रममा उनले ५ छक्का र १ चौकासहित ४६ रन खर्चिए।
पहिलो ओभरमा ३ छक्कासहित १७ रन खर्चिएका सन्दीपले आफ्नो व्यक्तिगत दोस्रो ओभरको पाँचौ बलमा पहिलो विकेट लिए।
उनले टोलीका लागि ८४ रन बनाएर खेलिरहेका जेम्स भिन्सलाई क्याच आउट गर्दै पिएसएलमा डेब्यू विकेट लिए।
यस्तै आफ्नो व्यक्तिगत तेस्रो ओभरको अन्तिम बलमा मुल्तान सुल्तानका कप्तान सोएब मल्लिलाई आउट बनाए।
यस्तै आफ्नो अन्तिम तेस्रो बलमा आन्द्रे रसेललाई ७ रनमा आउट गर्दै तेस्रो विकेट लिए। उनले आफ्नो व्यक्तिगत चौथो ओभरको तेस्रो बलमा रसेललाई आफैं क्याच गर्दै विकेट लिए।
गत बर्ष आईपीएलमा डेब्यु गरे यता विश्वका हरेकजसो फ्रेन्चाईज लिगमा खेलिसकेका सन्दीपले हालै अष्ट्रेलियामा सम्पन्न बिग ब्यास लिगको फाइनलसम्म खेलेका थिए।
उनको टिमले अहिलेसम्म तीन खेल खेलेकोमा २ खेलमा पराजित तथा एक खेलमा मात्रै जित हात पारेको छ।
उनी अस्ट्रेलियाबाट पीएसएल लिग खेल्न यूएई गएका हुन्। पीएसएल पछि उनी आईपीएलका लागि भारत आउने छन्।
