५० रन मा आफ्ना महत्वपूर्ण ५ विकेट गुमाएको भएपनि लय समात्दै अफगानिस्तानले आयरल्यान्डलाई पाँच विकेटले हराएको छ। मोहम्मद नबी तथा नजीबुल्लाह जादरानको नटआउट ४९ र ४० रनको मद्दतमा उसले बिहिबार टी-२० मा आयरल्यान्डलाइ हराएको हो। आयरल्यान्डमाथि टी-२० मा यो उसको लगातार आठौं जित हो।
जीतसँगै तीन म्याचको सिरिजमा अफगानिस्तानले १-० को अग्रता लिएको छ। दुबैले हाल भारतमा एकअरकासँग म्याच खेलिरहेका छन्। देहरादुनस्थित राजिब गान्धी अन्तराष्ट्रिय क्रिकेट रंगशालामा भएको खेलमा टस जितेर आयरल्यान्डले पहिलो ब्याटिङ रोजेर अफगानिस्तानलाई ६ विकेटको क्षतिमा १३२ रनको लक्ष्य दिएको थियो।
आयरल्यान्डका लागि जज डकरैलले नटआउट ३४ रन जोडेका थिए भने स्टुअर्ट पोयन्टर, कप्तान पल स्ट्रलिङ तथा स्टुअर्टले क्रमश: ३१, २३ तथा १८ रन जोडेका थिए। अफगानिस्तानका लागि राशिद खान र मोहम्मद नबीले समान २-२ विकेट लिदां मुजीब उर रहमान तथा करिम जनतले १-१ विकेट झारेका थिए।
आयरल्यान्डले दिएको १३३ रनको लक्ष्य पछ्याउँदै जवाफी ब्याटिङमा उत्रेको अफगानिस्तानले पाँच विकेट सस्तैमा गुमायो। पाँच विकेट झरेको अवस्थामा उसले केबल ५० रन जोडेको थियो। खेल अफगानिस्तानको हातबाट उम्किएको गेपनि उसले शानदार खेल देखाउँदै आयरल्यान्डलाई पाँच विकेटले निराश पार्यो।
अफगानिस्तानका हजरतउल्लाह (११), कप्तान असगर अफहान (५), शमिउल्लाह शेनवारी(१७) कतिम जनत(०) तथा शराफुद्दिन अशरफ(६) रनमै समेटिएका थिए।
उनीहरू पश्चात मैदान छिरेका नबी र जादरनले अफगानिस्तानको गुमेको लय फर्काए र चार बल बाँकी छँदै टोलीलाई जिताए।
छैटौं विकेटका लागि उनीहरू नटआउट ८६ रनको साझेदारी गरेका थिए। नबीले ४० बलमा पाँच चौका तथा १ छक्का प्रहार गरेका थिए भने जादरानले ३६ बलमा तीन चटका र १ छक्का प्रहार गरे।
आयरल्यान्डका लागि बायड रेन्किनले दुई तथा पिटर चेज, जोशुआ लिटल तथा शेन गेटकाटेले १-१ विकेट लिएका थिए।
उनीहरूबिच दोश्रो खेल शनिबार हुनेछ।
