आगामी माघ ११ देखि सुरू हुने नेपाल विरुद्धको सिरिजका लागि युएईले मोहम्मद नाबिदको कप्तानीमा टोली घोषणा गरेको छ।
नियमित कप्तान रोहन मुस्ताफा प्रतिवन्धमा परेकाले युएईको कप्तानी फास्ट बलर मोहम्मद नाबिदले गर्ने भएका हुन्।
नाबिदले नेपाली घरेलु क्रिकेटमा पोखरा प्रिमियर लिग र एभरेस्ट प्रिमियर लिगसमेत खेलिसकेका छन्।
इमर्जिङ कप प्रतियोगिता दौरान आयोजकसँग असन्तुष्टी जनाउँदै सामाजिक सञ्जालमा लेखेका कारण मुस्ताफासहित तीन खेलाडीलाई युएई क्रिकेट बोर्डले आठ साताको प्रतिबन्ध लगाएको छ।
सिरीज माघ २० सम्म चल्नेछ। कुल ६ खेल हुने प्रतियोगितामा ३ खेलको ओडिआई र ३ खेलको टी-२० इन्टरनेशनल सिरिज हुनेछ।
यस्तो छ युएईको टोली:
मोहम्मद नाभिद (कप्तान) मोहमद उस्मान (उप-कप्तान), अस्फाक अहमद, चिराग सुरी, साइमन अनवर, मोहम्मद बुता, घुलाम शाबर, इमरान हैदर, ताहिर गुघद, अमिर हायत, जाहुर खान, क्वादिर अहमद, फहद नवाज, खब्दुर शाकुर, सुल्तान अहमद, सीपी रिजवान
युएई सिरिजको तालिका
- माघ ११ - पहिलो एक दिवसीय अन्तर्राष्ट्रिय
- माघ १२ - दोस्रो एक दिवसीय अन्तर्राष्ट्रिय
- माघ १४ - तेस्रो एक दिवसीय अन्तर्राष्ट्रिय
- माघ १७ - पहिलो टी-२० अन्तर्राष्ट्रिय
- माघ १८ – दोस्रो टी-२० अन्तर्राष्ट्रिय
- माघ २० - तेस्रो टी-२० अन्तर्राष्ट्रिय
सबै खेलहरू दुबईमा खेलिनेछ।
नेपालले पनि प्रतियोगिताको लागि यसअघिनै २० सदस्यीय प्रारम्भिक टीमको घोषणा गरिसकेको छ।
यस्तो छ नेपालको प्रारम्भीक टोली
पारस खड्का ( कप्तान ) , अविनाश बोहारा , बसन्त रेग्मी, भिम शार्की, बिक्रम सोब , बिनोद भण्डारी, दिपेन्द्र ऐरि, ज्ञानेन्द्र मल्ल, करण केसी, ललित भण्डारी , ललित राजबंशी , आरिफ शेख, पवन सर्राफ, प्रदिप ऐरि , रोहित पौडेल, सन्दिप लामिछाने, शरद भेसावकर , सोमपाल कामि , सन्दिप जोरा , सुशन भारी
सिरिजको लागि नेपाली टिमले बुधबार देखि तयारी थालिसकेको छ। सिरिजको दौरान नेपाली टिमलाई भारतीय ब्याटिङ कन्सल्टेन्ट उमेश पटवालले प्रशीक्षण दिइरहेका छन्।
गत वर्षको मार्चमा एकदिवसीय मान्यता पाएपछि नेपालले अगष्टमा नेदरल्याण्डसँग २ वटा एकदिवसीय अन्तर्राष्ट्रिय खेलेको थियो। उक्त सिरिज एक-एक बराबरीमा सकिएको थियो।
त्यसपछि एसिया कप छनोटमा युएईसँगै नेपालले एउटा ओडिआई खेलेको थियो। त्यसपछि अब हुन लागेको खेल नेपालको चौथो एक दिवसीय हुनेछ।