भारतीय क्रिकेटर हार्दिक पाण्ड्याले बुधबार बीसीसीआईलाई स्पष्टिकरण दिँदै एक टिभी कार्यक्रममा महिलाविरूद्ध गरेको टिप्पणी प्रति माफी मागेका छन्।
महिलामाथि विवादास्पद टिप्पणी गरेको भन्दै पाण्ड्यालाई भारतीय क्रिकेट कन्ट्रोल बोर्ड (बिसीसीआई) ले २४ घन्टा भित्र स्पष्टिकरण दिन भनेको थियो।
उनले आफ्नो टिप्पणीले महिलामाथि पर्न गएको अफ्ठ्यारो र असभ्यताका लागि माफी मागेका हुन्।
‘मैले एक च्याट शोमा उपस्थित भएर आफूले बिना कुनै महसुस दिएको बयानले यति अपमानजनक बनाउँदै दर्शकको भावनामा ठेस पुर्याउँछ भन्ने सोचेको थिइनँ। यसका लागि विन्रमतापूर्वक माफी माग्न चाहन्छु,’ उनले भनेका छन्।
पाण्ड्याले अगाडि भनेका छन्, ‘म तपाईँहरूलाई आश्वस्त पार्न चाहन्छु कि यसमा मेरो कसैलाई पनि ठेस पुर्याउने उद्धेश्य होइन। मेरो भनाई समाजको कुनै पनि वर्गलाई खराब तरिकाले औल्याउने होइन। मैले शोका दौरान कुराकानी गर्दै दिएको बयान यस्तो आपत्तिजनक हुन्छ भन्ने मलाई जानकारी भएन,’ उनले भने,‘आश्वस्त रहनुहोस्, म बीसीसीआईलाई सम्मान गर्छु र यस्ता घटना भविस्यमा नदोहोर्याउने बाचा गर्दछु।’
भारतीय क्रिकेट कन्ट्रोल बोर्ड ( बिसिसिआई ) ले दुई युवा क्रिकेटरहरु लोकेश राहुल र हार्दिक पान्ड्यासँग स्पष्टीकरण माग गरेको थियो।
एक टेलिभिजन कार्यकर्मका क्रममा दिएको विवादास्पद अन्तर्वार्ता पछि राहुल र पान्ड्या प्रति बिसिसीआईको प्रशासक समितिले कदम चालेको थियो।
भारतीय चलचित्र निर्माता समेत रहेका करन जोहरले चलाउने चर्चित कार्यक्रम “कफी विथ करन ” मा दुई क्रिकेटर लोकेश राहुल र हार्दिक पान्ड्याले केहि प्रश्नहरुको उत्तेजक एवं अपाच्य उत्तर दिएका थिए।
कार्यक्रमका क्रममा दिएको जवाफको स्पष्टीकरण दिनका लागि दुबै खेलाडीलाई २४ घण्टाको समय सीमा दिइएको थियो।
जनवरी ६ तारिमा प्रस्तुत सो कार्यक्रममा कार्यक्रम संचालक करन जोहरले पान्ड्या र राहुललाई केही ब्यक्तिगत, सम्बन्ध र भारतीय टोलिसंग सम्बन्धित प्रश्न राखेका थिए। सो प्रश्नहरुको जवाफ दिने क्रममा पान्ड्या र राहुल नश्लवादी बनेको र महिला तथा अन्य फ्यानहरु माथी अपमान राखेको भन्दै पछिल्लो केही दिनमा आलोचना भएको हुँदै आएको छ।
कार्यक्रमको दौरान हार्दिक पान्ड्यालाई उनको महिलासँगको सम्बन्धसँग जोडिएको प्रश्न गर्दा हार्दिकले अचम्मित पार्ने खालको जवाफ दिएका थिए। पहिलो पटक एक महिलासँग शारीरिक सम्बन्ध बनाएपछि हार्दिकले आफ्नो घरमा पुगेर ‘आज करके आया है’ अर्थात नेपालीमा ‘आज गरेर आएँ” भनेर सुनाएको बताएका थिए।
यस्तै एक पार्टीमा आफ्नो माता-पितासंग जाने क्रममा माता-पिताले हार्दिकलाई कुन केटीलाई हेरिराको छौ भनेर सोध्दा हार्दिकले एक-पछि अर्को महिलातर्फ औला देखाएर सबैलाई हेरिरहेको छु भन्ने जवाफ दिएको बताएका थिए। हार्दिकले आफ्नो माता-पिता खुला सोचको भएको बताउदै आफ्नो अनुभव खुलेरै बताएका थिए।
बढ्दो आलोचना पछि हार्दिक पान्ड्याले सामाजिक संजाल मार्फत बुधवार माफी समेत मागेका थिए। आफ्नो इन्स्टाग्राम, फेसबुक र ट्वीटरमा पोस्ट गर्दै पान्ड्याले आफूले नियोजित ढंगले कसैको अपमान गर्न नचाहेको र कार्यक्रमको प्रकृति अनुसार प्रस्तुत हुन मात्र खोजेको बताएका थिए।
अहिले पाण्ड्या अष्ट्रेलियाविरूद्धको एक दिवसीय प्रतियोगिताका लागि अस्ट्रेलियामा छन्। उनी आगामी शनिबारदेखि हुने तीन वानडे सिरिज खेल्नेछन्।
