भारतीय खेलाडी रवि इन्दर सिंहले नटआउट १२५ रन बनाएपछि राजधानीमा जारी एभरेष्ट प्रिमियर लिग (ईपीएल) मा भैरहवाले विजयी सुरूवात गरेको छ।
त्रिवि क्रिकेट मैदान कीर्तिपुरमा आइतबार भएको लिगको तेस्रो खेलमा पोखराले दिएको २१६ रनको लक्ष्य भैरहवा ग्ल्याडीयटर्सले अन्तिम २ बल बाँकी छँदै भेट्टायो।
पोखराले प्रस्तुत गरेको २ सय १६ रनको विशाल लक्ष्य पछ्याएको भैरहवाले रविको बिस्फोटक शतकमा ६ विकेट गुमाएर भेट्टायो।
ईपीएलमा कीर्तिमानी जित निकाल्ने क्रममा म्यान अफ दी म्याच रविले ४७ बलमै शतक पुरा गरेका थिए। कुल ६० बल खेलेका उनले १० छक्का र ८ चौका प्रहार गर्दै १ सय २५ रनमा नट आउट रहे।
भैरहवाका लागि पुनित मेहेरले १८ रनमा नट आउट रहँदा रायन टेन डोस्काटे १६, प्रदीप ऐरी ११, कप्तान शरद भेषवाकर ६ रन बनाए। आरिफ शेखले २३ रन जोडेपछि कीर्तिमानी जित सम्भव भएको हो।
सुरूवाती दुई ओभरमै ओपनर हरि शंकर शाह र प्रदीप ऐरीलाई गुमाएको भैरहवाको सुरूवात कमजोर थियो।
११ ओभरमा ४ विकेट गुमाउँदै ७३ रनमा खेल्दै गरेको भैरहवालाई रविन्दर सिंह र आरिफ शेखले पाँचौ विकेटका लागि उत्कृष्ट साझेदारी गरे। सिंह र आरिफले ८९ रनको साझेदारी गरेपछि भैरहवाको इनिङस उकासिएको थियो।
थप तीन ओभरमा टिमको स्कोर १६० रन हुँदा आरिफ आउट भएका थिए। त्यसपछि रोहित पौडेल र पुनित मेहरासँग साझेदारी गर्दै रविले भैरहवालाई ऐतिहासिक जित दिलाए।
इपिएलको इतिहासमा यति ठूलो लक्ष्य पछ्याउँदै भेट्टाएको यो पहिलो अवसर हो।
पोखराका लागि शुशन भारी, विक्रम शोब र कोग्लिनले समान २-२ विकेट लिए पनि टोलाई जिताउन सकेनन्।
त्यसअघि टस जितेर पहिला ब्याटिङ गरेको पोखराले निर्धारित २० ओभरमा ५ विकेट गुमाउँदै २ सय १५ रन बनाएको थियो। उसका लागि ओपनर रिचर्ड लेभी र काइल कोट्जरले पहिलो विकेटको लागि १ सय ४ रनको शतकीय साझेदारी गर्दै टिमको विशाल योगफल तयार पारेका थिए।
दक्षिण अफ्रिकाका ओपनरसमेत रहेका लेभीले आक्रमक ब्याटिङ गर्दै २३ बलमा अर्धशतकसहित ३६ बल खेल्दै ७९ रन बनाए।
कृष्ण कार्कीले विकेट लिनुअघि उनले ७ छक्का र ७ चौका प्रहार गरेका थिए। यस्तै सुनिल धमलाले ३८ रन बनाउँदा कप्तान कोट्जरले ४७ रन जोडे।
पल कोग्लिनले २० रन बनाउँदा विनोद भण्डारी ६, राजेश पुलामी मगर ३ र सौरभ खनालले ७ रन बनाएर आउट भएका थिए।
भैरहवाका लागि कृष्ण कार्की, पुनित मेहरा, अभिनास कर्ण र रायनले समान एक-एक विकेट लिएका थिए।
यो जितसँगै भैरहवा लिगको शीर्ष स्थानमा उक्लिएको छ। यसअघि आजै भएको पहिलो खेलमा ललितपुरले चितवनलाई ११ रनले हराएको थियो
भोलिको पहिलो खेलमा चितवन टाइगर्सले काठमाडौं किङ्स इलाभेनको सामना गर्ने छ भने दोस्रो खेलमा ललितपुरले पोखराको सामना गर्नेछ।