भारतीय क्रिकेट बोर्डमाथि पाकिस्तानी क्रिकेट बोर्डले क्षतिपूर्तिसहितको मुद्दा अन्तर्राष्ट्रिय क्रिकेट परिषद (आईसीसी) ले खारेज गरिदिएको छ।
आइसीसीको विवाद निरूपण समितिले केही साता अगाडि सुनुवाई गर्दै दुबै पक्षका पदाधिकारी र वकिलहरूको कुरा सुनेको थियो।
मंगलबार दुबईमा बसेको आइसीसीको बैठकले सो समितिको निर्णय सार्जवनिक गर्दै बीसीसीआई विरूद्ध पाकिस्तान क्रिकेट बोर्ड (पीसीबी) ले क्षतिपूर्तिसहितको माग दाबी खारेज गरेको हो।
साथै आइसीसीले यो निर्णयका विरूद्ध अपिल गर्न नमिल्ने बताएको छ।
पीसीबीले भारतीय क्रिकेट बोर्डमाथि द्विपक्षीय श्रृंखलासँग सम्बन्धी सहमति पत्र (एमओयू) को पालना नगरेको आरोप लगाएको थियो।
पीसीबीले बीसीसीआईमाथि एमओयूको पालना नगरेको भन्दै ६ करोड ३० लाख डलर रूपैयाँको क्षतिपूर्तिसमेत मागेको थियो।
एमओयुमा भएको सम्झौता अनुसार भारतले सन् २०१५ देखि सन् २०२३ को बिचमा पाकिस्तान र भारतबीच ६ द्विपक्षीय शृंखला हुनुपर्थ्यो।
बीसीसीआईले पाकिस्ताको जवाफ दिँदै एमओयू अनुसार खेल्नुपर्ने बाध्यकारी नभएको बताएको थियो।
सन् २०१५ देखि २०२३ को बीच सबै राष्ट्रले दुई पक्षीय रुपमा क्रिकेट खेल्नुपर्ने आइसिसीको वैधानिक नियमको भारतले पालना नगरेको आरोप पाकिस्तानले लगाएको थियो। यसका लागि भारतीय क्रिकेट बोर्ड (बीसीसीआई) सँग क्षतिपुर्ति माग गर्दै पाकिस्तानले आइसिसिमा मुद्दा हालेको थियो।
भारत र पाकिस्तानबीच सन् २००७ मा अन्तिमपटक क्रिकेट सिरिज भएको थियो । पाकिस्तानले अन्तिमपटक भारतीय भूमिमा सन् २००७ मै टेस्ट सिरिज खेलेको थियो । त्यसपछि दुई राष्ट्रबीच क्रिकेट सिरिज भएको छैन । सन् २०१३ मा पाकिस्तान भारतमा खेल्न राजी भएको थियो । तर, सन् २००८ को मुम्बई आक्रमणको बहाना बनाउँदै भारतले पाकिस्तानसँग नखेल्ने घोषणा ग¥यो ।