पाकिस्तानविरुद्धको पहिलो टेष्ट क्रिकेटमा न्युजिल्यान्डले रोमाञ्चक जित निकालेको छ।
आबुधाबीमा सोमबार सम्पन्न पहिलो टेष्ट क्रिकेटमा न्युजिल्यान्डले पाकिस्तानलाई ४ रनले हराउँदै नाटकीय रूपमा जित हात पारेको हो।
शेख जायद स्टेडियममा न्युजिल्यान्डले दिएको १७६ रनको सामान्य लक्ष्य पछ्याउने क्रममा पाकिस्तानले ५८. ४ ओभरमा अलआउट हुँदै १७१ रन मात्र जोड्न सक्यो।
पाकिस्तान एक समय १ सय ३० रनमा चार विकेटको अवस्थामा थियो। तर त्यसपछि २० ओभरमा मात्र ४१ रन बनाउँदा अलआउट भएपछि उसले ४ रनको नाटकीय हार ब्यहोर्यो।
पहिलो इनिङ्समा न्युजिल्यान्डले १ सय ५३ रन बनाउँदा पाकिस्तानले २ सय २७ रन बनाएको थियो। पहिलो पारीमा ७४ रनको अग्रता लिएको पाकिस्तान विरूद्द दोस्रो इनिङ्समा न्युजिल्यान्डले २ सय ४९ रन बनाएपछि पाकिस्तानले १ सय ७६ रनको लक्ष्य पाएको थियो।
तर दोस्रो इनिङ्समा असाद सफिक ४५ र अजहर अलीले ६५ रन बनाए पनि टोलीलाई जिताउन सकेनन्। पाकिस्तानका पुछारमा ४ ब्याट्सम्यानले खाता खोल्न नपाउँदै आउट भए।
न्युजिल्यान्डलाई नाटकीय जित दिलाउन अजाज पटेलले ५ विकेट लिँदा इश सोधी र नील वाग्नेरले समान दुई-दुई विकेट हात पारे।
तीन टेस्ट शृंखलामा न्युजिल्यान्डले १–० को अग्रता कायम गरेको छ।