वेष्टइन्डिजमा जारी महिला टी-२० विश्वकपमा समूह चरणको अन्तिम खेलमा इंल्याण्डलाई हराउँदै घरेलु टोली समूह विजेताका रूपमा सेमिफाइनलमा प्रवेश गरेको छ।
इंल्याण्डले दिएको ११५ रनको लक्ष्य वेष्टइन्डिज महिला टिमले अन्तिम ३ बल बाँकी छँदै ६ विकेट गुमाएर पुरा गर्यो।
घरेलु टोलीलाई जिताउन डोट्टिनले ४६ तथा क्याम्पबेलेले ४५ रनको योगदान दिइन्। बाँकी सबै खेलाडीले दोहोरो रनको स्कोर छुन सकेनन्। इंल्याण्डकी स्रुबसोलेले ३.३ ओभरमा १० रन खर्चिएर तीन विकेट लिए पनि टोलीलाई जिताउन सकिनन्।
यसअघि टस हारेर पहिले ब्याटिङको निम्तो पाएको इंल्याण्डले निर्धारित २० ओभरमा ८ विकेट गुमाउँदै ११५ रन बनाएको थियो। उसका लागि ड्यून्क्लिले ३५,स्रुब सोलेले २९ तथा ओपनर व्यूमोन्टले २३ रन बनाउनुबाहेक अरूले दोहोरो रनको स्कोर छुन सकेनन्।
इंल्याण्डलाई सस्तैमा समेट्न वेष्टइन्डिजका डोटिन र सेलमानले २-२ तथा कोनेल, टेलर र फ्लेक्चरले १-१ विकेट लिए।
यो सँगै सेमिफाइनल समिकरण पुरा भएको छ। समूह ए बाट विजेता बनेको वेष्टइन्डिजले समूह बिको उपविजेता अष्ट्रेलियासँग पहिलो सेमिफाइनल खेल्नेछ भने दोस्रो सेमिफाइनलमा भारतले इंल्याण्डको सामना गर्नेछ। दुबै खेल बिहिबार हुनेछन्।
समूह ए बाट दक्षिण अफ्रिका, श्रीलंका र बंगलादेश बाहिरिए भने समूह बी बाट न्यूजिल्याण्ड, पाकिस्तान र आयरल्याण्ड बाहिरिएका छन्।