वेस्ट इन्डिजमा जारी आईसीसी महिला विश्व टी-२० क्रिकेट प्रतियोगितामा भारतले लगातार चौथो जित निकाल्दै समूह विजेताका रूपमा अन्तिम चारमा प्रवेश गरेको छ।
समूह बी मा रहेको भारतीय महिला टीमले शनिबार उत्कृष्ट प्रदर्शन गर्दै तीन पटकको विश्व च्याम्पियन तथा यस पटकको दाबेदार अष्ट्रेलियालाई ४८ रनले हराउँदै सेमिफाइनलमा प्रवेश गरेको हो।
जीतका लागि १६८ रनको लक्ष्य पछ्याएको अष्ट्रेलियाली टोली १९.४ ओभरा अलआउट हुँदै ११९ रनमा समेटियो।
भारतको जीतमा अफ स्पिनर अनुजा पटेलले उत्कृष्ट बलिङ गर्दै ३.४ ओभर बलिङ स्पेलमा १५ रन खर्चिएर तीन विकेट लिइन्।
दिप्ती शर्मा, राधा यादव र पुनम यादवले २-२ विकेट लिँदै अष्ट्रेलियाली इनिङस् ध्वस्त पारे।
अष्ट्रेलियाका लागि एलीसे पेरीले नटआउट ३९ रन बनाइन्। एसलीग गार्डनरले २० तथा बेथ मुनीले १९ रन बनाउनु बाहेक अन्यले राम्रो खेल्न सकेनन्।
यसअघि टस जितेर पहिले ब्याटिङ गरेको भारतीय टोलीले निर्धारित २० ओभरमा ८ विकेट गुमाउँदै १६७ रन बनाएको थियो। पछिल्लो दुई खेलमा लगातार अर्धसतक बनाउने मिताली राजलाई आराम दिइएको खेलमा स्मृति मन्धनाले सर्वाधिक ८३ रनको पारी खेलिन्। ५५ बल खेलेकी उनले ३ छक्का र ९ चौका प्रहार गरिन्। यस्तै कप्तान हरमनप्रीत कौरले २७ बलमा ४३ रनको बिस्फोटक ब्याटिङ गरिन्। उनले तीन चौका र तीन छक्का प्रहार गरिन्। यी दुईले तेस्रो विकेटका लागि ६८ रनको साझेदारी गर्दै भारतीय इनिङ्स उकासेका थिए। भारतका बाँकी खेलाडीले दोहोरो रनको स्कोर छुन सकेनन्।
अष्ट्रेलियाकी एशलीग गार्डनरले २५ रन खर्चिँदै २ विकेट लिइन् भने डेलीसा किममिनसेले ४२ रन खर्चिएर २ विकेट लिइन्।
यो सँगै समूहमा अपराजित रहेको भारत समूह विजेताका रूपमा सेमिफाइनल प्रवेश गरेको छ। यस्तै उपविजेताका रूपमा अष्ट्रेलिया पनि सेमिफाइनलमा पुगेको छ।
भारतले पहिलो खेलमा न्यूजिल्याण्डलाई ३४ रनले हराएको थियो भने दोस्रो खेलमा पाकिस्तानलाई ७ विकेटले हराएको थियो। तेस्रो खेलमा आयरल्याण्डको चुनौती ५२ रनले पन्छाउँदै सेमिफाइनलमा प्रवेश गरेको थियो। समूहको अन्तिम खेलमा अष्ट्रेलियालाई ४८ रनले हराउँदै समूह विजेता बन्यो।
यो सँगै प्रतियोगिताको सेमिफाइनल समिकरण पुरा भएको छ। समूह ए बाट आयोजक वेष्टइन्डिज र इंल्याण्ड तथा समूह बी बाट भारत र अष्ट्रेलिया अन्तिम चारमा प्रवेश गरेका छन्।
दुबै सेमिफाइनल बिहिबार हुनेछन्।
आइतबार समूह एको अन्तिम खेलमा समूह विजेताका लागि वेस्टइन्डिज र इंग्ल्याण्ड खेल्दैछन्।
