आगामी सन् २०१९ मा हुने १२ औं संस्करणको इन्डियन प्रिमियर लिग (आईपीएल) का लागि सहभागी ८ टोलीले ४४ विदेसीसहित १३० खेलाडीलाई रिटेन गरेको छ।
डिफेन्डिङ च्याम्पियन चैम्पियन चेन्नई सुपरकिंग्सले कप्तान महेन्द्र सिंह धोनी तथा रोयल च्यालेन्जर्स बेंगलुरूले भारतीय कप्तान विराट कोहलीलाई रिटेन गर्दा दिल्ली डेयरडेविल्सले गौतम गम्भीर तथा किंग्स इलेभेन पञ्जाबले युवराज सिंहलाई रिलिज गरेको छ।
१२ औं संस्करणको आईपीएलका लागि आगामी डिसेम्बर १८ मा अक्सन हुँदैछ। अक्सन अगाडिनै आठ फ्रेन्चाइजी टिमले खेलाडीको रिटेन तथा रिलीज गरिसकेका छन्।
मुम्बई इन्डियन्सले आफ्ना कप्तान रोहित शर्मालाई १५ करोड रूपैयाँमा रिटेन गर्यो। यस्तै चेन्नईका धोनीलाई १५ करोडमा क्लबले रिटेन गर्दा बैंलूरूले कोहलीलाई १७ करोड रूपैयाँमा रिटेन गरेको छ।
दिल्लीले १५ करोडमा ऋषभ पन्तलाई रिटेन गर्दा चेन्नईले सुरेश रैनालाई ११ करोडमा रिटेन गरेको छ। यस्तै पञ्जाबले लोकेश राहुललाई ११ करोडमा रिटेन गर्दा कोलकाताले सुनिल नारायण तथा राजस्थानले स्टीवन स्मिथ र बेन स्टोक्सलाई १२.५० करोडमा रिटेन गरेको छ। हैदराबादले डेविड वार्नरलाई पनि १२.५० करोड रूपैयाँमा रिटेन गरेको छ।
मुम्बईले हार्दिक पांड्यालाई र बेङ्गलुरूले एबी डिविलियर्स तथा हैदारावादका मनिष पाण्ड्यालाई ११ करोडमा रिटेन गरेको छ।
बिभिन्न ८ टोलीमध्ये चेन्नईले सबै भन्दा बढी ८ विदेशीसहित २३ खेलाडीलाई रिटेन गरेको छ। हैदाराबादले २०, दिल्लीले नेपाली युवा सन्दिप लामिछानेसहित १५, पञ्जाबले १०, कोलकाताले १३, मुम्बईले १८, राजस्थानले १६ खेलाडी तथा बैंलुरुले १५ खेलाडीलाई रिटेन गरेको छ।
आगामी १८ डिसेम्बरमा हुने अक्सनबाट २० विदेशी र ५० भारतीयसहित ७० खेलाडीको खरिद हुनेछ।
कोलकाता नाइटराइडर्स (केकेआर) ले मिशेल जोनसन, टम कुरेन, क्यामरून डेलपोर्ट तथा जावोन सियरलेसलाई रिलिज गरेको छ। फ्रेन्चाइजीले कुल १३ खेलाडीलाई रिलिज गरेका छन्।
फ्रेन्चाइजी टिमले खेलाडीको रिटेनका लागि ५१०.७५ करोड भारतीय रूपैया खर्च गरेको छ। अब १४५.२५ करोड भारतीय रूपैयाँ बाँकी छ। यसमध्ये पञ्जाबसँग सबैभन्दा बढी ३६.२० करोड भारतीय रूपैयाँ बाँकी छ। यस्तै दिल्लीसँग २५.५० करोड, राजस्थानसँग २०.९५ करोड, बेंगलुरूसँग १८.१५ करोड कोलकातासँग १५.२० करोड, मुम्बईसँग ११.१५ करोड, हैदराबादसँग ९.७० करोड र चेन्नईसँग ८.४० करोड भारतीय रूपैयाँ बचेको छ।
